Myanmar ram ah Nuclear Energy (စွမ်းအင်) sehzung sak ding in Russia nih timhtuahnak a ngei
The Chinland Post | 2022 September 7 – Myanmar ram ah Nuclear Energy sehzung a hme mite pakhat sak bawmh khawh ding in kan i ruahchan tiah Russia cozah nih a ngeihmi Rosatom Nuclear Energy Corporation nih a thanh.
Russia ah an tuahmi 2022 EEF ah 2022-2023 ca Myanmar-Russia rianṭuanṭinak muisam pakhat cu kaphnih nih lungtling tein min an thut i cu chungah Nuclear Energy kong an telh chih. Cu kaphnih hnatlak minthutnak ah Russia a phanmi SAC hruaitu General Min Aung Hliang a kai kho i kaphnih hnatlaknak minthut ah SAC Technology lei Minister le Electrical Energy lei Minister nih Myanmar ram aiawh in min an thut.
Cu hnatlaknak chungah Nuclear kong he pehtlai in Russia-Myanmar rianṭuanṭinak kong an telh chih. Ramhnih karlak riikhiahnak tuah ding, Myanmar ah Nuclear Energy sehzung a hmete sak khawhnak, Nuclear Energy he pehtlai in mipi cohlannak ngah khawh ding in tuah ding zong kha aa tel chih.
SAC hruaitu General Min Aung Hliang cu EEF kai ding ah Russia ram a phan i cu Forum kai ding in sawmmi ramdang bawi pawl bantuk in Russia President Putin he adang tein tonnak a ngei ve lai.
About The Author
