Myanmar ram buainak chungah Sexual Violence pawl UN nih ralrinnak a pek

The Chinland Post | 2022 June 21 – Myanmar ram ah hramhram in uknak lak a si hnu ah SAC ralkap le tlangcung hriamtlai phu, PDF hna karlak ah kahdohnak an chuah lioah Sexual Violence he pehtlai in phuannak a karh tuk tiah UN nih a chim.

June 19 ah a tlami Buainak lioah a Chuakmi Sexual Violence Tlauternak Ni ah UN General Secretary i buainak lioah a chuakmi Sexual Violence lei palai nih report a chuah i report chungah Myanmar ram he pehtlai in langhtermi a um.

Duhlo-langhternak le hramhram uknak dulo-cawlcanghnak pawl lehrulhnak ah ralkap le palik nih duhlonak a langhtermi mipi pawl le thawngzamh rianṭuantu pawl sin ah Sexual Violence telh in thazang tampi a hman tiah a langhter.

Cawlcanghnak chungah a lang khunmi ngandamnak lei thiamsang pawl, sayamah pawl le nu pawl a ngiathlei hna i, sizung telh in ngandamnak lei hmunhma pawl cu SAC nih hmunhma a khuar caah tlaihhrem a tongmi thlopnak le nau khamnak pawl a donh tiah a langhter.

Cun 2017 ah Kawl ralkap nih a tuahmi hmunhma zohfelnak chungah Bangladesh ram ah a zaammi Rohingya miphun hna nih phungning tein rianṭuannak nawl an ngeih lo caah phungning loin minung ramdang ah kuatnak le eihmuarnak a tam deuh kho tiah langhter a si.

Ralzaam hna nih an umnak camp hruaitu sin ah an phuanmi Sexual Violence hna cu kan zulhphung le kan tlaihtleng ruangah sualnak a tuahtu pa le sual a simi (a ingtu) nu umter behnak hna kha a karh chin tiah a chim.

Cucaah June 19 ah a tlami Buainak chungah a Chuakmi Sexual Violence Tlauternak Ni ah Sexual Violence dihter ding le Sexual Violence a tongmi minung pawl sin ah bawmhnak a phak khawhnak hnga UN nih nawlnak a tuah.

Na ruahning rak langhter ve.. (Leave a comment)

%d bloggers like this: