President Biarocah Ning In FDA Director Dr. Taan Htuat Cu Sing 1500 A Eihmuar Caah An Tlaih

TCP-Thantlang| 2018 April 22| Kawlram chung eidin le sii lei zohfeltu zung (FDA)Director a simi Dr. Taan Htuat nih ningcang lo in ks. sing 1500 a ei hmuar caah April 20 ah tacuai a tong tiah theih a si.

President U Win Myint biarocahnak a chimmi ah eihmuar kong hi fakpi in ka doh lai tiah a chim ni 20 hnu ah Dr. Taan Htuat cu eihmuar kong ah a voikhatnak bik an tlaih hi a si. President U Win Myint chan ah zozah rian sang lutlai pakhat a simi a hmasa bik ziknawh eihmuarnak in tazacuai an tuah zong a si.

Thil sining cu FDA Director Dr. Taan Htuat cu 2017 kum chungah atu a umnak Naypyidaw kam khua pakhat a inn hmun ah inn saknak caah a herhmi thilri, inn chung thilri herhhaimi vialte, hi pin ah hmundang ah inn hmun a ngeih thanmi cu thirhrihling in kulhmi, tlakrawh inn dot khat, motor chiahnak parking, inn dot hnih sang tlak rawh inn, tilionak, kaih-ti pakhat le zi-pann pakhat tel in a zapi a tangka in sing 1500 leng hman dingin Company tender a hmumi hna sin in a hal hna tiah eihmuar lei zohfeltu phu nih an langhter.

Atu bantuk in Company sin ah a halmi hna cu Naypyitaw FDA Operation tuahnak inn hnih le ramkulh le ramthen hmun 20 ah pengkomh zung a sa dingin Tender a hmumi hna si in a hal hna hi a si.

“Atu bantuk in a pipa ngaimi eihmur hmuh le theih timi hi ka thei tuk lo, hi thawng in cozah zung riantuantu tampi zong an i ralring ngai lai tiah” tiah zungriantuan pakhat nih a chim

Eihmuarnak upadi 56 ningin tazacuai a si i hi upadi ah kum 10nak tam lo thong thlak khawh a si tiah aa tial, Dr. Taan Htuat cu kum 60 minung a si tiah kan theih.
Ref: 7Daydaily News

Na ruahning rak langhter ve.. (Leave a comment)

%d bloggers like this: