Myanmar ram hmunhma a cheu leng ERO le PDF pawl nih an tlaih khawh : Duwa Lashi La
The Chinland Post | 2023 February 27 — Myanmar ram hmunhma zapi chung in a cheu leng cu tlangcung hriamtlai phu pawl (ERO) le PDF pawl nih an tlaih khawh i peng 154 ah mipi uknak phu kan dirh tiah NUG caan karlak President Duwa Lashi La nih a chim.
Khit Thit Media he biaruahnak ah atu bantuk in a chim hi a si.
“Kan ram hmunhma a cheu leng cu PDF le ERO pawl nih an tlaih khawh cang. A kauh hmanh a kau deuh rih lai. Ahlei khun in Chin ramkulh ah 70% – 80% tiang an tlaih khawh. Cubantuk in Sagaing ramṭhen, Magway, Kachin, Kayah (Karenni), Karen ram hna zong ah SAC nih khuapi chung lawng a tlaih khawh i khuate hmunhma hna ahcun dothlennak phu pawl nih a tlaih khawh caah a cheu leng hmanh a si lai. A tam-u hi cu kan tlaih khawh cang. Kan tlaihnak hmunhma pawl zong ah mipi uknak phu pawl dirh a si. Peng 154 ah mipi uknak phu a dir kho i pengkomh 9 ah pengkomh uknak ṭha tein a dir kho” tiah caan karlak President Duwa Lashi La nih a chim.
Tlangcung hriamtlai phu pawl nih an tlaihnak hmunhma ah NUG nih peng 78 ah ngandamnak, fimcawnnak rian zong a ṭuan khawh i biaceih zung 25 a dir kho tiah a chim.
“Cubantuk in tlangcung hriamtlai phu nih hmunhma tampi an tlaih khawh i SAC nih a duhnak poah a kal kho lo tiah a chim. Peng 78 ah uknak phu kan dirh i ngandamnak le fimcawnnak rian pawl zong a kal kho. Cucaah fimcawnnak zong khua 198 ah kan ṭuan khawh. Biaceihnak zong mipi hna anmah tein peng 21 ah an tuah khawh i upadi zung zong 23 a dir kho. Upadi lei thiamsang pawl zong riankhinh ding kan i zuam lio a si. Biaceih zung hi 25 kan dirh khawh cang tiah chim ka duh” tiah caan karlak President Duwa Lashi La nih Khit Thit ah a chim.
About The Author
