Myanmar Ram Minung 2 Million Hrawng Nih Innlo An Zaamtak
The Chinland Post | 2023 October 3 — Myanmar ram minung 2 Million deng hrawng nih innlo an zaamtak caah zatlang bawmhnak phu pawl a herh hringhran ko tiah UNOCHA nih a thanh.
A cang cuahmah mi ramchung buainak le kokek thil ṭihnung ruang ah innlo a zaamtak mi, mipi a thi mi le mipi ngeih mi thilri sunghnak hna pehzulh in a can lengmang caah Myanmar ramchung minung bawmhnak dirhmun hi chiat lei a panh chin tiah a thanh fawn.
Cun a puak kho mi hriam nih mipi thinphang in a tuah chin lengmang hna i Naypyitaw dah ti lo, adang peng le ramṭhen zapi ah bomrap nih mipi tampi a hliamh hna i an nunnak a liam tiah UNOCHA nih a chim.
Ramchung le vawlei cung ram kip bawmhnak phu pawl zong bawmh awk a tmtuk mi dirhmun kha a rannak in bawmhnak an pek khawh nak hnga an rianṭuannak thazang an ṭhawnter chin i 2023 kum cheu chung ah minung 1.8 Million leng bawmhnak an pek khawh hna.
Asinain bawmhnak pek duh zong ah rikhiahpiak mi le uknak phu nih kham mi a um lengmang caah bawmhnak pek ding hi rak i ruah cia mi nak in a rau deuh, asilole ṭhialkam a hau mi dirhmun hna a phak caah temhtuarnak a ing mi pawl fak deuh in an tuar chin tiah report ah an langhter.
