Myanmar ram Northwest ah ralzaam sing 3 leng an phan
The Chinland Post | 2022 April 7 – Chin ramkuh, Sagaing ramṭhen, Magway le Chin ramkulh hna ah kahdohnak a fah chin lengmang ruangah inn le lo kaltak in a zaami sing 3 leng an si cang tiah United Nations Office for the Coordination of Humanitarian Affairs (UNOCHA) nih April 6 ah a thanh.
2022 March 28 tiang fehtermi cazin ning cun ramchung inn le lo aa zaamtakmi 904,600 an um i cu chungah 558,000 hi hramhram in uknak lak a si hnu ah aa chapmi an si tiah UNOCHA cazin ah a langhter. Myanmar ram in ralzaam hnarcheu leng hi Sagaing, Chin le Magway ramṭhen hna in an si.
Sagaing ramṭhen Kawlin, Kalay le Wuntho peng ah minung 31,000 deng le Chin ramkulh Kanpetlet ah minung 1,500 hrawng inn le lo an kaltak tiah April 6 ah a thanh.
Kahdohnak a fah chin ruangah mah hmunhma hna ah bawmhchannak pekding cu a har chin tiah UNOCHA nih a chim.
SAC ralkap nih hmunhma zohfelnak (operation) a tuah le kahdohnak a chuah peng rih ahcun inn le lo a zaamtakmi an karh chin ko lai tiah cathanh chungah a telh chih.
Hramhram in uknak lak a sihnu in a tutiang Northwest Myanmar ah biaknak lei inn telh in mipi inn le mipi ngeihmi thilrii 7,246 leng mei in khanghpiak a simi thawngpang zong kan theih tiah UNOCHA nih a chim.
Kahdohnak hmunhma ralzaam pawl caah bawmhchannak pekding cu fak piin khamh a si caah ralzaam pawl nih an herhmi bawmh a har tuk tiah UNOCHA nih a langhter.
About The Author
