Myanmar Ram Tanghra Ah Mark Tambik Hmutu Tin Mya Nwe He Biaruahnak

0

City Hunter| 2018 June 4| 2018 kum Myanmar ram pumpi tanghra result cu June 2 ah an chuah i a phitu 789,845 lakah 259,191 an awng, zatuak in 32.82% a si. Distinction hmutu 75,756 lakah Biology major in Myanmar ram pumpi ah mark tambik hmutu cu Nu Tin Mya Nwe a si, mark 553 a hmu. Amah hi No.1 Dagon in 6D (All Distinction) he tanghra awngmi a si. Subject pakhat ah buaktlak in mark 92 renglo lawngte a hmu. Kum 16 a simi Nu Tin Mya Nwe aa zuamnak le teinak a hmuhmi kong he 7Day News nih biaruahnak an tuahmi kan hun langhter.

7Day: Ram pumpi huap in mark tambik hmutu na sin naa hngalh tikah zeitindah na tuar (feeling)?
TMN: Myanmar rampumpi ah pakhatnak si (The Whole Burma first) hi kaa tinhngam nemmam lo. Ka ruah lo ning lengpi in ka ngah tikah ka khuaruah a har, ka lau tuk. Cun, kaa nuam tuk fawn.

7Day: Atu bantuk mark tambik hmuhnak ding ah zeibantuk ruahnak he dah naa zuam?
TMN: All Distinction (6D) hmuhding kaa tinh. Asinain kumcheu camipuai zong ah sianginn ah mark tambik ka hmu. Kumdongh pre-test zong ah mark 553 ka rak ngah tikah mah ningte in ngah than ka duh. The Whole Burma First ka si lai ti cu ka rak i ruahchan lo.

7Day: Myanmar rampi ah mark tambik hmu kho ding in kumkhat chung zeitindah tha na chuahning le naa zuamning a si?
TMN: Timetable a dikthliar tein kaa tuah lo. Camipuai ka phit chunh tikah ka thader deuhmi subject paoh kha biapi ah chia in tamdeuh in ka zoh. Nikhat cawnmi nikhat thiam ding in ka zoh. Zinglei ah sianginn kai a tamdeuh tikah zanlei sang in suimilam 12:00 tiang caanhmaante in ca ka zoh. Sianginn kai caan le cuu-sinn kai caan a um lo tikah ca ka zoh. Nikhat ah ihcaan hi a tlawm bik suimilam 6 tal ih khawh kaa zuam. Sianginn camipuai zong thate in ka phi. Camipuai puaipi ka phit hlan deuh i sianginn ah a hnu bik camipuai kan phit lio zong ah mark 553 ka ngah.

7Day: Subject pawl zeibantuk in dah na zoh? Subject pakhat hnu pakhat in na zoh dih maw?
TMN: Sayate nih a kan chimh lio caan ah a zapi te hngalh khawh ding in thate in ka ngaih. Kaa chingchiah. Keimahte in ka zoh than tik caan ahcun a biapibikmi le a herh deuhmi pawl thim in tamdeuh in ka zoh.

7Day: Tukum camipuai ah English subject hi kumdang question he aa khat lomi tete a um tikah hihi Distinction hmu kho ding in zeitindah na phit?
TMN: Tukum cu English hi question phundang te he a thar a hung si. Essay, Letter zong phundang te thlen in a hal. Grammar zong question a merh (a hleh). A pekmi tlangtar (title) chung i khi keimah he zei bantuk kong hi dah mark tamdeuh ka hmuh lai timi thate in ka ruah hnu ah ka phit. Tlangtar ka rel dih hnu ah ka tial dingmi kha a tlangpi in ka chingchiah hmasa i cu chung in ka ruah nolh than hnu ah ka tial.

7Day: Saya/mah te nih tah zeitindah an in bawmhchanh?
TMN: Saya/mah te nih cachimh he hmakhat te ah mark pekning phunglam tiang in a kan cawnpiak. Hi kong ah mah hi phit ahcun mark zeizat dah an pek? Mah aa tel lo ahcun mark zeizat dah an thumh tibantuk tiang a dikthliar te in a kan chimh.

7Day: Cazoh huam lo tiang in lungretheih (pressure) caan na ngei bal maw? Na lungretheihmi zeitindah na thumh than tawn?
TMN: Camipuai phi huam lo tiang in lungrawhnak ka ngei bal lo. Lungretheihnak ka ngeih ahcun cu lio cu ca ka zoh lo. Lam kaa chok, hla ka ngai, TV ka zoh. Tlawmte ka lungdam deuh le ka hirha a kawh deuh in ka zoh than. A caancaan ahcun hawikom hna he lehlang in khualtlawn tibantuk zong ka hmang tawn.

7Day: Sianginn ca pin ah a lenglei hngalhkauhnak petu ca (general knowledge) pawl na rel bal maw?
TMN: Sianginn ca pin ah thawngthanhca (newspaper) ka rel. Saya Min Lu cauk pawl ka rel. Mingalar Maungmelu cauk pawl zong ka rel. Cun, ngiatthlai (spy) lenhloi pawl rel zong hi ka huam ngai.

7Day: Na nu le na pa nih tah zei pawl dah an in bawmh?
TMN: Fimcawnnak lei ahcun ka nu nih ca ka zoh tikah a ka thutpi peng, a ka hngah peng. Ca ka zohmi chim le rel ka duh tik zong ah a ka zohpiak. Ngandamnak lei zong ah chambaunak um lo ding in eidin tiang in a kan tawlrlpiak dih.

7Day: Na ngakchiat te in atu tiang zeibantuk thiamhlei laksawng pawl dah na co?
TMN: Tangcheu in tangriat tiang kum fatin te pakhatnak, pahnihnak laksawng ka ngah peng. Tangli ka kai lio ah a lamkip thiamhlei hmuhsaknak (htoo-chun) kaa zuam i subject kip ah laksawng ka co. Tangnga in tangriat tiang Mathematics thiamhlei kaa zuam i peng, pengkomh le ramthen level tiang laksawng ka co. Tangriat lio ah Myanmarsa thiamhlei zuamnak ah ramthen dirhmun tiang in laksawng ka co. Essay zuamnak pawl ah kaa zuam i laksawng ka co.

7Day: Zei bantuk university kai dah naa timh?
TMN: Kaa fiang tuk rih lo. Sii lei (medicine) sianginn asilole Yangon Technological University pakhat khat ah kai kaa tim. Ka huam deuh mi tu cu Yangon Technological University hi a si.

7Day: Naa zohchunhmi le na uarmi minung an um maw?
TMN: Ka uarmi le ka bochanm in cun ka pa hi a si. Ka ngakchiatte in a tu tiang sualnak lam hoih lo in biaknak lei ah ningcangte le dingfelte in karhlan ding a ka cawnpiak peng. Palhnak in nun cawn i nun i remh thiam ding thazaang a ka pek peng, a ka cawnpiak peng. Cun, sianginn ca pin ah a lenglei cauk pawl, newspaper pawl a ka cawkpiak i a ka relter peng. Cun, ka u nu zong hi tanghra ah 6D in a rak awn tikah kaa zohchunhmi pakhat a si. Ca ka zoh tik zong ah zeibantuk pawl dah a biapi, zeibantuk pawl hi dah zoh hrimhrim a herh tibantuk a ka chimh, a kan bawmhchanh.

7Day: Ca thiam hlei mino pakhat dirhmun in tanghra a phi dingmi hna sin ah chim le cah na duhmi?
TMN: Hmaikum cu question pungsan an thlen lai ti a si caah kan phit dingmi question pungsan he aa tlak in thiam ding le fiangte in hngalh khawhnak ding ah saya/mah te chimmi kha thate in i chingchiah uh. Ngandamnak lei ralringte in i zohkhenh ding. Biaknak lei zong biapi ah chia uh ti hi ka chim duhmi a si.

7Day: Atu bantuk in na kan leh caah kan i lawm.
Ref: 7Day News

About The Author

Na ruahning rak langhter ve.. (Leave a comment)

%d bloggers like this: