Myanmar Ram Tlaihhremnak Voi 2500 Chung Ah Voi 30 Renglo Ralkap An I Tel

City Hunter| 2018 May 6| Myanmar ram pumpi, kumhnih chung ah tlaihhremnak voi 2500 renglo a chuak i ralkap hi voi 33 an i tel tiah Runvennak Ralkap Bawizik nih a chim.

UN runvennak council chungtel palai hna he April 30 an i ton lio ah a chim tiin General Ming Aung Hlaing facebook ca hmai ah an thanh.

France ram in a zungzal chungtel palai a simi Ms. Anne Christine Marie Gueguen nih Rakhine ramkulh kong he pehtlai in a pahnihnak bogyokegyi Aye Win nih chekhlatnak a tuah i sualnak a ngeimi pawl dantat an si tiah a chimmi ruang ah zei bantuk sualnak tiang dah palhnak an ngeih, zei bantuk sualnak pawl dah an si, zeibantuk dantatnak dah an tuah, hmailei ah hi bantuk thil a can ti nakhnga lo zeitindah nan kilven timi hngalh kan duh. Ralkap nih sex lei kong sualnak an tuahmi an um ti kan theih i UN ah Myanmar ram he pehtlai in khat le khat zumhnak ser in ramkip mibu he i bawmhnak caah UN he i bawmh a herh kong le zeitindah kan cawlcanghnak lai timi hngalh ka duh tiah a chim.

Ramkip palai Mr. Kairat Umarov zong a luancia Rakhine ramkulh thil cangmi chung ah tlaihhrem a um ti kan theih nain Myanmar ralkap nih tuahmi chekhlatnak ah ralkap lei in tlaihhremnak voi 3 lawng a umti theih a si ruang ah ruahdeuh ngai a hau.

Myanmar ram cu Buddhist biaknak a zulmi ram pakhat kan si ruang ah tlaihhremnak, a biapi in nu hna cung i thil sual tuahnak ahmuh he pehtlai in zeiti hmanh in ngaihthiam awk a tha lomi ram a si. An laakmi cazin ning ah 2016 ah tlaihhremnak zapi hi voi 1116 a cang i hi chung ah ralkap lei in ahmuh 16 aa tel. 2017 kum, Myanmar rampi biaceih zung ah report tuahmi tlaihhremnak zapi hi voi 1422 a cang i ralkap lei in 17 an i tel. Hi bantuk phungbuari cu thong kum 20 tla ding in biakhiahpiak an si.

“Kan tuanbia hi kanmahte in kan tial lai. A luancia kum 5 chung zatlang mi tlangcungmi hna cung ah phungbuarmi sualnak caah tuanvo ngeitu tat-mah-hmu pakhat cu thong kum 5 tla ding in biakhiah a si. Cu bantuk in amah le amah aa vennak a si ko nain mi a that tiah ruahmi zong thong kum 2 dantat an si. Cu pin ah zatlang mi Tlangcung mipakhat cu timhciammamte in thah a si caah thong kum 10 dantat le fahnak pek ruang ah thong kumkhat dantatnak, le a donghnak bik Rakhine ramkulh Indin khua ah a cangmi mithah lainawnnak ruang ah thong kum 10 cio thlak an si” tiah Runvennak Ralkap Bawizik General Min Aung Hlaing nih a chim.

Tat-ma-taw cu Myanmar ram aiawhtu ralkap kan si i ralkap lutlai pakhat ka si nain kan ram ah ram hruaitu President kan ngei. Tat-ma-taw cu President hruainak tang ah kan cawlcang i Myanmar cozah bu hruainak tang ah a ummi a si. Cun, tat-ma-taw cu upadi nih a onhmi le a pekmi nawlngeihnak he a cawlcangmi kan si ti zong Runvennak Ralkap Bawizik General Min Aung Hlang nih a chim.
Ref: DVB Burmese

Leave a Commnet

%d bloggers like this: