Myanmar Ramchung Pumtlamtlinglo Caah Khenkhamnak Tampi A Um Rih

0

Hakha-TCP |2018 December 3| Myanmar ramchung pumtlamtlinglo covo kongkau he pehtlai in Upadi phunglam an chuah cang ko nain phunglam rian tuan a nuarh deuh caah pumtlamtlinglo hna zalonnak khenkhamtu tampi a um rih tiah kan theih.

Pumtlamtlinglo thanchonak lei zohkhenhtu (DDI) tawrelnak in pumtlamtlinglo ni tonpumhnak cu Kalay ah zapi tlukrual tein umnak, pumtlamtlinglo mi cawisannak” ti tlangtar in pumtlamtlinglo mi tu lio a si ning kongkau DDI Director Salai Joshua nih tihin a chim.

“Kan Kawlram chung ah hin pumtlamtlinglo mi zalonnak kan chim tikah hin abiapi bik in khenkhamnak hi a si. Cucaah hi khenkhamnak kong he pehtlai in pumtlamtlinglo mi hi zeiti hmanh in zalonnak a um rih lo. Khenkhamnak tamtuk a um, hmunkip, kakip ah a si. Policy khenkhamnak a um, cun riantuannak lei zong ah a um. Hlei le Lam lei zong in a um, cun pehtlainak lei zong in tampi khenkhamnak aum. Hi vialte khenkhamnak hi hloh khawh hlan chung cu kanmah pumtlamtling hna caah kan zalong tiah chim khawh a si rih lo” tiah a chim.

Kawlram chung ah pumtlamtlinglo mi kongkau he pehtlai in zungkip le mizapi kar ah theih thiamnak cawnpiaknak hi a tlawmtuk lawng tuah a si caah pumtlamtlinglo mi pawl zomhtaihnak zong a tam. Cu pin ah pumtlamtlinglo Upadi zong felfial tein tuah tuan khawh a si lo caah pumtlamtlinglo mi kongkau ah Kawlram hi Asia ramchung ah hnubik dirhmun ah a um peng rihnak hi a si tiah a chimchap.

Hi Kalay ah um mi DDI hi pumtlamtlinglo mi a dirkamhtu bu an si i a biapi in rian an tuanmi cu pumtlamtlinglo mi thanchonak caah a si.

“Hlan ah cun thleidannak hi a um, tu hrawng cu phunglam le pumtlamtlinglo mi phunglam zong a hun chuak cang i thleidannak hi a tlawm deuh cang. Kawlram i pumtlamtlinglo mi Upadi zong a hlan nakin a sang deuh cang. Pumtlamtlinglo mi hmailei an thanchonak zong tampi a bawmh i pumtlamtlinglo mi nunnak zong tampi a sang chinchin cang. Asinain a herhmi cu tampi an um rih ko” tiah Aung Hein Oo nih a chim.

2014 kum milu relnak ning in Myanmar rammi zatuak 4.6% in minung nuai 2.3 hi pumtlamtlinglo mi an si. Hi chung in milu 35669 hi Chin ramkulh in a tambik an si i ramkulh milu relnak ning in zatuak 7.6% an si i Kawlram ah a tam bik chang a si.

Ref: Khonumthung, Chin World

About The Author

Na ruahning rak langhter ve.. (Leave a comment)

%d bloggers like this: