Tial Cung Thang Telh In Myanmar Rammi Pathum Nih Teinak An Hmuh
March 8 zan ah aa thua ding Myanmar rammi pathum
Tawk Tling Thang| 2019 March 8| March 8, Yangon, Thuwana Indoor Stadium ah zan suimilam 6:00 in thawkmi One Championship- MMA thuatnak ah Tial Cung Thang telh in Myanmar rammi pathum an i thua i an pathum te in teinak an hmu.
March 8 zan tuahmi One Championship-MMA ah puai 14 an i thua. Hi chung ah Myanma rammi minung pathum an i thua. Cu hna cu; Bozhena Antoniya, Tial Thang @Tial Cung Thang le Phoe Thaw an si.
Hika ah Tial Cung Thang aa thuatnak video tlingte in zoh khawh a si.
A puai 3nak ah Myanmar ram nu Bozhena Antoniya le Malaysia nu Audreylaura Boniface cu Atomweight level in an i thua i a round 2nak ah Myanmar nu nih a tei. A puai 8nak ah Tial Cung Thang le Cambodia pa Rin Saroth cu Catch weight (68,0KG) level in an i thua i Tial Cung Thang nih mark relnak in a tei. A puai 13nak ah Phoe Thaw (Myanmar pa) le Indonesia pa Yohan Mulia Legowo cu Featherweight level in an i thua i Phaw Thaw nih around 1nak a dih hlan ah a tei.
Tial Cung Thang hi One Championship- MMA ah a hmasa bik aa thuat a si. One Championship-MMA ah Chinmi chung in a hmasa bik tuanbia thar tialtu a si.
“MMA i ka luhnak a ruang bik cu World Champion si duh ruah asi ko” tiah Tial Cung Thang nih The Chinland Post ah a chim.
Tial Cung Thang hi Bantamweight ah aa thua lai i caan khatkhat cun World Champion laksawng a co khotu a si te lai ti a zumhnak kong Aung La Nsang nih a chim. Cu lawng si lo in amah Aung La Nsang pumpak hrimhrim zong nih thuat a cawnpi.
Tial Cung Thang hi USA wrestling i thuatnak New York State championship voihnih a co bal cang. Cu pin ah BJJ Brazilian Jujitsu ah blue taisawm zong a rak co bal cang. Cun, Lai paih zong ah voi 5 bual a co bal cang tiah kan theih.
About The Author
