Myanmar Vice President Pu Henry Van Thio nih Hakha ah Naungeihter Cawnnak Sianginn Hunnak a tuah

Salai Cung Cung| 2020 February 15| Chin Ramkulh chung um nu le ngakchia hna, inntek mizapi ngandamnak zohkhenh le thanchoternak caah tiin Naungeihter le zohkhenhtu sayamah hna an um khawhnak ding le inntek mizapi nih ngandamnak kong an cawn khawhnak hnga le rian an ngah khawhnak hnga, lamhla I a ummi Chin mi hna kan ngandam khawh khawhnak hnga caah tiin Hakha Nursing School cu Hakha Thar February 15, 2020 zing sml 10:00 ah Kawlram Vice President Pu Henry Van Thio, Chin Chief Minister Salai Lian Luai, Chin Ramkulh Hluttaw speaker Pu Zo Bawi, Social Minister Pu Pau Lun Min Thang, Ngandamnak le Lentecelhnak Vuanci zung zungzal zungriantuan Professor Dr. Thet Khan Win, Ngandamnak le Minung thanchonak zung General Director Dr. Tin Tin Lay, Hakha Nursing School sianguk Daw Ei Ei Myint hna telh in sianginn hunnak an tuah tiah thawng kan theih.

“Hi bantuk naungeihter ningcang cawnnak sianginn honnak kan tuah khawh hnu ah nu nau ngei mi le fa caah ngandamnak lei zoh khenhtu ding sayamah hna tampi chuah khawh ding le Chin ramkulhchung ngandamnak lei a thancho chin lengmang nak hnga i zuam kan herh” tiah Chief Minister nih a chim.

Hi sianginn cu 2018-2019 tangka um ah Ramkomh Cozah hnatlaknak in tangka Kyats nuai 973.200 cuai in Hakha Education College pawng ah Ekah 23 kau hmun chungah an sak mi a si tiah kan theih. Hlan ah siangngakchia hi kumkhat ah minung 50 hrawng cohlan khawh ding ka ti nain hmunhma le saya-sayamah harnak um ruang ah siangngakchia minung 32 lawng cohlan an si tiah minister Pua Lun Min Thang nih a chim

Hi sianginn ah a kai kho ding mi pawl cu, Tedim in minung 7, Khaikam in minung pakhat, Hakha in minung pathum, Mindat in minung 6, Tonzang in minung 3, Tedim in minung pakhat, Falam in minung pakhat, Matupi in minung 6, Lailenpi in minung pakhat, Kanpetlet in minung pakhat le Thantlang in minung pakhat an si. Hi sianginn cu kum hnih kai a si I Diploma degree pek an si lai. Tu lio Chin ramkulh ah naungeitertu sayamah minung 500 leng an herh tiah kan theih.

Kawlram Vice President Pu Henry Van Thio, Chin Chief Minister Salai Lian Luai le Chin Ramkulh Hluttaw speaker Pu Zo Bawi hna nih Seh onnak in Signboard puan zar onnak le hmanthlaknak hna an ngei. Ref: Zalen + IPRD hakha