Myingyan Peng Taungpung Khua Kahdohnak Ah SAC Ralkap A Thi Mi An Tam
The Chinland Post | 2023 July 17 — Mandalay ramṭhen, Myingyan peng, Taungpung khuate ah kahdohnak a chuak i bawmh ding in a raa mi SAC ralkap mawṭaw pawl an kah hna caah SAC ralkap 17 an thi tiah Myingyan pengkomh B05, C2 (MGN 35 Guerrilla) phu nih thawng an thanh.
July 16 zinglei sml 9:15am hrawng ah Myingyan peng, Mepauk khuate in Taungpung khuate chung ah thazang 23 hrawng in a rak lut mi SAC ralkap pawl chung in ralkap 5 cu an i thuh lio ah 40MM lung 2 in an kah hna caah kaphnih karlak kahdohnak a chuak i ralkap 2 an thi, kahdoh a chuahnak hmunhma ah Myingyan in ralkap mawṭaw 2 in a rak kai mi cu Myingyan-Nabuaiang lam ah bomrap lung 12 in an puah hnawh hna i mawṭaw 1 a sop dih leng ah aa cit mi ralkap tampi an thi tiah theih a si.
Kahdohnak chung ah Myingyan pengkomh B05, C02 le Myingyan Captain Saga phu hna bawm in kahdohnak an tuah tiah theih a si.
