Myinmu Ah PDF Ruak 3 An Hmuh Chap, A Thi Mi 28 Tiang An Phan
The Chinland Post | 2023 September 26 — Sagaing ramṭhen, Myinmu peng ah SAC ralkap nih an i relh lo kar ah kah ruang ah a thi mi PDF ruak 3 cu September 23 zaanlei ah an hmuh chap ṭhan caah a thi mi hi 28 tiang an phan cang tiah Delta News Agency nih a langhter.
“September 23 zinglei tiang 25 an thi. Khuami hna nih hmunhma an va thianh lio ah ruak 3 an hmuh chap” tiah PDF chungtel pakhat nih Delta News Agency ah a chim.
Atu bantuk in PDF chungtel ruak 3 an hmuh chap caah kahdohnak ruang ah a thi mi PDF 25 le mipi sawhsawh 3 tiah an zapi 28 an phan cang tiah theih a si.
SAC ralkap 30 hrawng an rak lut ti mi thawngpang ruang ah Chedaw khua in meng 1 le cheu hrawng aa hlatnak Cawmin khua ah a um mi PDF pawl an zaam.
Cubantuk in an zaam lio, Myinmu-Myaung lamcung, Myaung khua chaklei in meng 3 hrawng aa hlatnak ah a um mi Chedaw khua pawng ah SAC ralkap pawl nih an i relh lo kar ah an rak kah hna hi a si.
Cubantuk in SAC ralkap nih an kah hna ruang ah Cawmin khua in PDF 17, Myaung Battalion C05 in 5 le Cawmin khuami 3 hna an nunnak a liam i cu ni zaan ah PDF ruak 3 an hmuh chap hi a si.
SAC leiṭang Telegram Channel pawl nih cun Chedaw khua pawng ah palek pawl nih Myinmu-Myaung lam in a rak raa mi mawṭaw pakhat le cycle an hmuh caah an i thup i an bawh hna tiah a langhter.
Cu hnu ah PDF pawl an si kha an theih caah lam kam, kaphnih in an ceh hna i an kah hna caah PDF ruak 25, kutser meithal, kuanzen, bom le adang thilri pawl an lak tiah an langhter.
About The Author
