Na Duh Lo Mi Tlangval Nih An Helh Tik Ah Zeitindah Na Al Lai
TCP-Online| 2018 April 8| Tlangval pakhat nih helh tik ah kan duh lo tiah piangko in chim hi nungak ca ah a har ngai mi thil a si. Cu bantuk in kan duh lo tiah fiang pup in chim hi tlangval a cheu cu an i fahsak tuk tik ah nungak ca ah thil har ngaingai a si. Cu caah na duh lo mi tlangval asiloah na duh khawh bak lo ding mi tlangval nih an in helh sual a si cun a tanglei hi kan tial mi hi tuah ve hmanh. Helhnaih ti lo in an kal tak colh ko lai. A tanglei ah a changchang in kan hun tialmi hi tuah hmasa ding ti mi an si lem lo. Amah le aa rem ning hoih tete in tuah khawh cio an si ko.
Ka rian ah fakpi in i zuam ta ka duh
Nangmah nih DL ngeih na duh rih lonak le amah na duh lonak kong kha fakpi chim lem lo in atu na rian hi zeitluk in dah nangmah ca ah a biapit le zei dangdang i donhter lo in i zuam a hauh zia kha chim. Na rian kha na ca ah a biapit tuknak le zeidang thil ruah le thil dang kong ah caan pek naa harh kong kha chim lengmang. Na rian ti tik ah sianginn kai mi na si cun a tu na cawn mi hi zeitluk in dah i zuam a herh kong le a dangdang kong ruat rih lo in na ca kong lawnglawng hi naa hmaithlak a herh kong kha chimh i zuam.
Nungak dangdang he theihternak tuah
Nangmah nih na duh lo kha aa hngalh khawh nakhnga nungak dangdang kong ceihpi asiloah nungak pakhatkhat, amah he aa tlak lai tiah na ruah mi tbk he hna khin tarh hna, theihternak tuah hna. Cuti na tuah ah cun na lung ah a um lo tuk kha amah tein aa hngalh ko lai.
Duh ding mi tlangval na ngeih cang kha chim
Tlangval a tam deuh hi DL a ngei cang mi nungak cu an duh kho ti hna lo. Cucaah kei cu tlangval ngei thiam ding ka si ti lo. Duh ding mi tlangval ka ngei cang. Kan pahnih kan tlamtlin veve in cun chungkhar zong kan ser cang lai tiah na chimh a si ah cun aa mer colh bak ko lai.
Va pehtlai in bawmh va hal hlah
Thil pakhatkhat kong he pehtlai in bawmtu na herh tuk i a dang an um lo a si zong ah amah cu bawmh va hal hrimhrim hlah. Bawmh na hal in naa zulhkhalhter tawn a si cun a lung ah ka um pah ve ko hi ta tiah aa ruah khawh. Cun na herhnak ah bawmh lengmang ding in aa tim lai i hna an hnawh thai sual lai. Cucaah va pehtlai in bawmh va hal sual lai cih.
Lung tuaitam ding in chia hlah
Nungak tampi cu duh lo mi tlangval zong kha herhnak caan poh ah auh le uh tanh, a duh bantuk dedeng in um hmang mi an um tawn. Khi nih khin tlangval tampi lung tuaitam in a chiah hna. Ruahchannak an ngei peng rih. Cucu tlangval ca ah a poi taktak mi a si. A dawh zong aa dawh lo pin ah mi pakhat zeirel lo zong a si. Cucaah na duh lo a si cun duh lo tein um law amah he hlat i zuam. Na duhlonak kha na umtu in siseh, na hmurka zong in siseh a hmuhfian khawh nakhnga thutdir le holhrel i zuam.
Ref: Beauty & Health
About The Author
