Na Kan Dohkalh Peng Cun Chinram Hi Rampi Ah A Thangcho Lo Bik A Si Peng Lai; Minister U Soe Htet
The Chinland Post| 2018 December 2| Chin ramkulh cozah nih vawlei hmun ningcanglo in a chuhmi hna a um lo bantuk in acozah riantuannak pawl hi a zungzal in na dohkalh peng ahcun ramkulh le ramthen vialte lakah Chin ramkulh hi thanchonak a niambik a si zungzal ko lai tiah Chin ramkulh cozah bu in chimnak nawlngeitu Sipin Minister U Soe Htet nih ralrinnak bia a chim.
Sipin Minister U Soe Htet nih, “ Chin ramkulh cozah bu nih ningcanglo in vawlei hmun kan chut hna lo. Hakha, Falam le Kanpetlet ah vawlei hmun tampi an chuh hna an kan ti. Town plan caah a herhning bantuk in kan tawlrel bia tu a si. Vawlei le lo hmun a ngei lomi hna, innhlang mi pawl caah phunghrampi ning in tuahnak nawl kan ngeihmi he aa tlak in kan tawlrel bia tu a si. Vawlei hmun ngeitu hna he zong i remte le hnatla te in kan tawlrel. Ceihruahnak kan ngeih hna. Cozah nih a tuah dingmi a zapi te in an dohkalh. Cu tikah kannih nih zeitindah pehzulh in rian kan tuan lai. Hiti ning a si ahcun kannih cu ramkulh le ramthen 14 lakah a thangcho lo bik, a niam bik kan si lengmang ko lai” tiah a chim.
November 23 ah Chin ramkulh chung ramkulh cozah nih vawlei hmun ekah 10,000 renglo, Hakha peng ah ekah 2,700 renglo, Falam peng ah ekah 8,000 renglo le Kanpetlet peng ah ekah 800 renglo upadi he aa tlak in kan chuh hna. Yangon in hluttaw leng ziknawh eihmuarnak dohkalhtu commission in Secretary U Kyi Lwin, Hakha peng vawlei chuhtongmi mizapi leikap in palai U Hrang Kil, Kanpetlet peng vawlei chuh tongmi mizapi leikap in palai Pu Joseph, Falam peng in vawlei chuh tongmi mizapi leikap in palai Pu Tha Nei Ceu le Pu Van Lian Ring hna nih thawngfianternak an tuah.
Thawngfianternak a tuahtu hna nih a cunglei kong he pehtlai inn rampi President zong ton biaruah ding in nawl an hal.
Sipin Minister U Soe Htet nih, “Town plan tuah duh lo in pupa ram timi fekthup i tlaih in zuar le eihmur an duh. Ningcanglo chuhmi zong a si lo. Upadi ningte in phu ser i tawlrelmi a si” tiah a chim.
Chin ramkulh Sipin minister U Soe Htet nih, Hakha khuapi town plan tuahmi chung i ekah 100 chung ah innchungkhar 200 hrawng innhmun an pek cang hna. Hakha Cawbuk sang zong ah ekah 676 ekah an tah cang. Falam khuapi ah ekah 8227 an tuah cuahmah tiah a chim.
Ref: Chin World
About The Author
