Naga Coach Pa Nih Chinmi Aa Pai Ding 5 Paih Phunglam A Cawnpiak Hna Lai

The Chinland Post|2019 March 6| Lai Paih le Naga paih phunglam aa dan tuk caah Naga Coach pa nih March 6 chun ah aa pai dingmi Chinmi 5 a cawnpiak hna lai tiah kan theih.

Anmah Naga lei nih Chinmi aa pai dingmi hna caah champion hlun a simi coach pakhat an kan pek. Cu coach nihcun March 5 chun ah Rung Lian Ceu zong a chimh cang. Thaizing chun (March 6) ah kanmah Chinmi minung 5 aa pai dingmi a cawnpiak than rih hna lai. A biapi in zeitindah i tlaih le i tengh khawh a si lai? Zei bantuk um ahkhin dah tengh le relh lo an si lai? tibantuk paih phunglam felfaite in a chimh cawnpiak hna lai tiah theih a si.

US, Delhi le Hakha in a rami aa pai ding lomi paoh cu anmah Naga Wrestling phu nih zohdawh, hmunnuam ah an kalpi hna lai. 2nd World War lio ah a rak cangmi Kohima khuapi chung i thlaan an zohkhenhnak an zohpi hna lai. Cu dih in Museum an zohpi hna lai. Cun, anmah Naga nih an ngeihmi nunphung puai an tuahmi an hmuhsak hna lai. Zanlei ah anmah Naga paih phu le paihthawng minung 60 renglo telh in ton biaruah, i hawikomhnak le zanriah dumtinak zong thaizing ah an ngei lai.

Hakha in aa thawhmi hna cu March 5 zan suimilam 11:00 tluk ah Nagaland khualipi Kohima khua an phan. Nagaland paih phu Vice President nih ramri Moreh tiang a don hna. Cu pin ah Kohima khuapi in President pumpak zong nih a don hna. Delhi lei in kanmah Laimi zong an phan. Hakha, Delhi, USA he kan zapi minung 17 tluk kan si.
Tutan Naga paih zuamnak ah kanmah Chinmi in aa pai dingmi hna cu; Rung Lian Ceu, Thawng Tling, Mang Hnin Thang, Tluang Zel Thang le Hrang Tin Thang an si.

March 7, India ram Naga ah tuahdingmi zuamcawh paih zuamnak ah aa pai dingmi minung 59 lakah Chinmi 5 an i tel.

March 7 ah aa pai dingmi minung 59 nihhin vote an zuh cio lai i aa tongmi paohmi an i pai lai. Lai le Lai vote zuh in an i ton sual zong ah an i pai ko lai. Vote zuh le zuamcawh bak in i paih a si lai. Sungh sual ahcun paihnak nawl ngeih a si ti lai lo. Awn thluahmah ahcun final phak in champion co khawh a si lai tiah kan theih.

Tutan ah anmah Naga paih phu nih biapi in fakthanh an tuahmi cu Rung Lian Ceu a si. Kohima khuapi chung ah Rung Lian Ceu hmanthlak le poster tampi an taar. Khuakip an sawm hna tiah kan theih.

An i paih caan cu anmah India caan in March 7 zingka suimilam 9:00 in zanlei 4:00pm tiang a si lai. US lei caan in cun March 6 zan suimilam 10:30 in an thawk lai. Kawlram caan in cun March 7, suimilam 10:00am in an thawk lai.
Hi Naga ram paih zuamnak ah laksawng cu; Pakhatnak laksawng caah Rs. 200,000, Pahnihnak laksawng caah Rs. 150,000, Pathumnak laksawng caah Rs. 100,000 an si.

An I paih lio payper view live in zoh khawh a si lai caah payper view zong Vanmiproductions.net
ah cawk khawh a si cang. Anmah Nagaland lei nih zei live hmanh kan thlah lai lo, nanmah Chinmi nih nan thlah dingmi kan i rinh an ti hna tiah kan theih.

Nagaland KOHIMA hi India ram chungah a ummi a si i India ram cu (UTC/GMT + 5.5) a si. An i paih caan cu anmah India caan in March 7 zingka suimilam 9:00 in zanlei 4:00pm tiang a si lai. US lei caan in cun March 6 zan suimilam 10:30 in an thawk lai. Kawlram caan in cun March 7, suimilam 10:00am in an thawk lai.

Na ruahning rak langhter ve.. (Leave a comment)

%d bloggers like this: