Naga Miphun Le Chin Miphun A Hmasa Bik I Hmuhtonnak Le Paihnak Ah Pu Ang Cung Bia Chimmi
The Chinland Post| 2019 March 6| Naga Paih phu le Chin miphun paih kong ah a hmasa bik i hmuhtonnak cu March 6, Nagaland state, Kohima khuapi Hotel Japfu ah an ngei. Hi ton biaruahnak ah Pu Ang Cung nih a tanglei bantuk in biachimnak le forhfialnak a ngeih.
A hmasabik le pakhatnak ah chim ka duhmi cu hika hmun damte le tluangte in a kan phaktertu kan biakmi Pathian a min ka thangthat. Hika hmun i Naga upa hna le Kawlram in a rami Laimi nan zapi kan hmuh hna i kaa lawm. Hi bantuk caan hi kan zapi te caah a sunglawi tuk hringhran.
Cun, a pahnihnak ah chim ka duhmi cu; Naga Paih upa pawl nih sawmnak ca na kan kuatmi cung ah kan i lawm. Nan ram kan rak phak tikah nan unau, nan tefa bantuk in nan kan zohkhenh, nan kan dawtmi cung ah kan i lawm. Pathian nih thluachuah in pe ko hna seh.
A hlei in lunglawmhnak biachim ka duhmi cu; Hi thil a can khawhnak ding ah biatakte in a kan zuampiaktu, upa Henry le Secretary Akhuzaw cung ah kan i lawm.
Atu cu keimah kong tawite in ka van chim ta lai. Ka min cu Pu Ang Cung ka si, US in ka ra. Ka chuahnak cu Hakha, Chin Kawlram a si. 2001 ah USA ka phan. Laimi hi nunphung a ngeimi kan si bantuk in kan nunphung hi hmailei ah a tlau sual lai ti ka ruah ruang ah 2004 thawk in kan pipu pa chan i an rak hman tawnmi kan Laithil kha USA in Hakha ah ka hei cah hna i ka khawmhsuatmi hna kha thate le a dangte in inn ah ka fim hna.
Cun, Laimi nih kan sunhsak taktakmi lentecelhnak phungkhat kan ngei, cucu Lai paih a si. Lai Miphun Ni (Chin National Day), February 20 ah chuahpi ka rak duh nain minung kan rak tlawm tuk rih caah kan rak tuah kho lo i 2006 CND February 20 ah hawi ka sawm hna i lai Paih cu kan rak thawk.
Nan zapi te sin ah chim duhmi pathum ka ngei.
- Nanmah he hawikomhnak ngeih duh ah kan ra. Zeicahtiah, nan paih hi youtube ah ka rak hmuh i kan Lai paih he aa lo tuk hringhran. Cucaah, hmunkhat te ah i tong hna usihlaw i pai ti hna usih timi saduhthahnak ka rak ngei.
- Hi bantuk nunphung lentecelhnak hi atu ah ram 12 aiawh in aa celh kho ding kan si cang. Cucaah cun, zeitindah a tha deuh le a sang deuh in tuah kho usih law ti ka duh. A si khawh ahcun, vawleipi nih theih khawh le cohlan khawh dingmi lentecelhnak si kho ding tiang in kan i zuam cuahmah lio.
- Atu thawk hin nanmah Naga he kan i bawm lai i kan paih hi kan thanchoter lai i paih zong hmailei ahcun kan i hrawng lai tiah timhlamhnak kan ngei. Cun, nanmah Naga i a thawng bikmi pahnih hi USA ah sawm kan in duh hna. Nanmah lawng si lo in aa paimi ramkip (US, Europe, Asia) zong kan sawm hna lai. Kannih World Paih Championship (WPC) nihcun aa paimi hi phunhnih in kan then hna. Cucu. Middleweight le Heavyweight tiin kan then hna. (pound 160 tang le 160 cung tiin). Pakhatnak le pahnihnak laksawng kan pek hna, pathumnak ca laksawng kan ser lo. Naga le Laimi nih kan ngeihmi kan paih zulhphung hi kan hrawm khawh ding a biapi tuk. Kannih WPC nih nanmah Naga paih zulhphung hi kan i cawnmi pakhat kan hman cang. Kan paih phung hi kan kir hlan ah ruah ti nak can kan ngei ta te hna lai.
Nan zapi te cung ah lunglawmhnak tam pi ka ngei.
World Paih Championship
Pu Ang Cung
Chairman
2019 March 7
Kohima, Nagaland (India)
About The Author
