Naga Paih Kal Ding In US Lei An I Thawh Cang; Hakha In Minung 11 An I Thawh Ve Lai

Tawk Tling Thang| 2019 February 27| Nagaland Paih Phu (The Nagaland Wrestling Association) nih a tuah dingmi avoi 12nak paih zuamnak Open Naga Wrestling ah pathawng Rung Lian Ceu telh in US lei an i thawh cang. Hakha lei in Chin hlasak thiam nu pahnih telh in minung 11 an thawh ve lai tiah kan theih.

March 7 ah tuah dingmi Naga paih zuamnak ah US in pathawng Rung Lian Ceu, Pu Ang Cung, Pastor Tin Za Peng cu February 27 (US lei caan in) ah Indianapolis vanlawng tual in an i thawh cang. Hakha in pathawng Thawng Tling, Mang Hnin Thang, Tluang Zel, Hrang Tin Thang, Chan Sang, Pu Bual Kung, hlasak thiam Biak Tha Cuai le Tawk Men, media lei in Chan Bik Lian le midang pathum hrawng zong hmaizarh nikhat ni khi Hakha in an i thawh ve lai tiah Pu Bual Kung sin in kan theih.

US in Naga lei ah aa thawhmi/Photo: Vanmi Production

Aa pai dingmi hi Rung Lian Ceu, Thawng Tling, Mang Hnin Thang, Tluang Zel le Hrang Tin Thang an si lai. US lei hi anmah US lei caan in February 27 ah dengteo in India ah an rak i thawh cang. Hakha lei hi Hakha-Tamu tiang motor in an kal lai i Tamu in anmah Naga upa hna nih an rak don hna lai.

Denmark in a rak tlungmi Lian Za Pum hi kal ding in timhtuah a si nain aa relrem lo caah amah aiawh ah Tluang Zel a kal lai.

An i paih caan cu anmah India caan in March 7 zingka suimilam 9:00 in zanlei 4:00pm tiang a si lai. US lei caan in cun March 6 zan suimilam 10:30 in an thawk lai. Kawlram caan in cun March 7, suimilam 10:00am in an thawk lai. Vanmi Production nih PPV in live an thlah lai. PPV hi $60 a si lai tiah kan theih.

Tutan hi international ah a hmasabik Lai paih kan i paih hmasa bik a si lai caah hmuh le zoh a duhmi paoh nih Vanmi Productions facebook page sin ah pehtlaih tuah i PPV in live zoh khawh a si lai tiah theih a si.

Tutan Naga ram i an va i paih dingmi kong ah World Paih Championship in haotu Pu Ang Cung nih atu bantuk in The Chinland Post ah a chim.

“Tutan Naga Paih zuamnak ahhin Rung Lian Ceu nih a tei ko hna lai. Nikum, Rung Lian Ceu Hakha a rak tlun lai ahkhan Hakha pawl cu Rung Lian Ceu nih zakhat ah 100%, chimporh ahcun zakhat ah 200% bak in a tei hna lai ti ka rak zumh cia bantuk te in a tei taktak hna. Tutan Naga paih zuamnak hi cu Naga pawl hi Rung Lian Ceu nakin an ngan deuh caah tlawmte cu aa harh deuh hna lai. Asinain, Rung Lian Ceu nih a tei hrimhrim ko hna lai ti hi zakhat ah 70% in ka zumh”.

“Anmah lei in an kan chimhning ahcun tutan Nagaland Paih Phu (The Nagaland Wrestling Association) nih a tuah dingmi paih zuamnak hi zuamcawh paih phun si dawh a si. Anmah Naga ram ahhin Paih phu (Association) hi pathum hrawng um dawh an si. Amah paih phu pathum in athawng bik cio tiah thimmi pawl pathawng i zuamcawhnak paih si dawh a si. Zei a si paoh ah tutan ah champion co le teinak cu kan duh. Asinain, cu nakin a biapi deuhmi cu kan Lai Paih hi International dirhmun in mi ramdang ah kan va i paih khawh dingmi hi teinak nganpi a si cang” tiah a biapeh ah a chimchih.

Hi Naga ram paih zuamnak ah laksawng cu; Pakhatnak laksawng caah Rs. 200,000, Pahnihnak laksawng caah Rs. 150,000, Pathumnak laksawng caah Rs. 100,000 an si.

World Paih Championship nih aa hmuitinhmi suttung pathum cu; Lai Pa thawng vialte nih Lai Paih in pawcawmnak khim tiang laksawng an hmuh khawhnak ding, ramchung ramleng hmunkhatte ah Lai Paih i hrawmti le i paihti ding, a pathumnak cu Lai Paih hi Sea-game (world level) tiang luhpi ding hi an si tiah kan theih.

Leave a Commnet

%d bloggers like this: