Naga Ram Ah Khuati Ruang Chuakmi Zawtnak In Minung 4 Thi Cang
TCP-Online| 2018 September 4| Sagaing ramthen Naga ram ah atu lio khuati ruang a chuakmi zawtnak in minung 4 an thi cang tiah Sagaing ramthen hluttaw palai U Sai Maung nih a chim.
“A thimi cu ngakchia lawngte an si hna. Donghi peng Nanyun khua ah a si. Ramthen cozah ngandamnaklei zung zong kan chimh hna i biatak in mah zawtnak cu an cithlat lai” tiah MP U Sai Maung nih cun a chim.
Hi zawtnak tlangrai cu August zarh khatnak khan a chuakmi zawtnak tlangrai pakhat a si i, a zawmi hna cu an cumpi, an khuh, thaw chuah har, chung tlik tibantuk in an zaw i September 3 tiang khan a si rih tiah Naga ram khuami hna nih an chim.
Hiti khuati ruang zawtnak tlangrai a tlun tikah ENDO ngandamnaklei phu le ralkap siibawi hna nih August 29 ni khan Naga ram ah kal in sii lei thlopbulnak zong an va tuah hna.
Naga ram hi tukum lawng ah tubantuk zawtnak tlangrai a tlung lo i 2017 kum lio zongah zawtnak tlangrai a rak tlung i minung 10 an rak thi. Cun, 2016 lio zongah cumpi tlangrai a rak tlung i minung 80 leng an rak thih cangnak ram a si.
Ref; The Voice
About The Author
