Avoi 12nak Nagaland Paih Zuamnak Ah Rung Lian Ceu Telh In Chinmi Pali An I Pai Lai
Tawk Tling Thang| 2019 February 4| Nagaland Paih Phu (The Nagaland Wrestling Association) nih a tuahdingmi avoi 12nak paih zuamnak Open Naga Wrestling cu a ralaimi March 7, an ram khualipi Kohima an tuah lai. Hi paih zuamnak ah World Champion Rung Lian Ceu telh in Chinmi palai va i pai ve ding in timhtuahnak an ngei tiah kan theih.
Hika ah atu lio Naga Paih Champion cotu pa aa paihnak pawl zoh khawh a si.
Hi kong he pehtlai in Hakha khuasa Pu Bual Kung nih, “World Paih Champion Phu haotu Pu Ang Cung hruainak in India ram Nagaland ah tuahdingmi Paih zuamnak ah kal kan i tim. USA in World Paih champion cotu Rung Lian Ceu, Denmark ram in pakhat, Hakha in Hrang Tin Thang le Mang Hnin Thang hi an va i pai lai. Pu Ang Cung le Rung Lian Ceu hi cu US in India ah an rak ra lai. Denmark in Hakha ah a rak tlung lai i Hrang Tin Thang (Hakha Khuahlun), Mang Hnin Thang (Hakha Khuathar) le Lian computer in Chan Biak Lian he tiin kan kal lai” tiah The Chinland Post ah a chim.
“Hakha in Tamu in Mawre lam in kan kal te lai. Keimah motor in Tamu tiang kan kal lai i Tamu in khin cun anmah lei nih an rak kan don cang lai. Tlunkalnak a dihmi cu Pu Ang Cung nih kanmah US lei nih kan rak tuaktaan te lai a kan ti. Aa pai dingmi hi a hlankan in min cazin pek cia a hauh caah anmah pali min cazin hi pek an si. February zarh donghnak in cun Hakha in i thawh kan hau ve te ko lai” tiah a biapeh ah a chimchih.
Denmark in a ra dingmi hi Paih thawng Tha Cung Lian si dawh a si tiah kan theih.
Naga miphun nih an nunphung paih hi an sunhsak ngaingai. Atu lio Naga paih champion hi a khing pound 220 a rit i a khan pe 6′ 2” a sang. Paih a duhmi paoh nih thla 2 hlan ah min pek a hau caah atu a kal dingmi Laimi pali min cazin cu pek an si ve cang tiah kan theih.
Naga Paih Phu hna nih Rung Lian Ceu aa paih lai tiah an thanh. Hi paih zuamnak ah laksawng cu; Pakhatnak laksawng caah Rs. 200,000, Pahnihnak laksawng caah Rs. 150,000, Pathumnak laksawng caah Rs. 100,000 an si.
Rung Lian Ceu hi American a phanh hnu ah atu hi voi 10 hrawng aa pai cang i cu chung ah voi 8 bual a co cang. Cun, USA in Chinram Hakha ah a tlung I nikum Chin Miphun Ni, Hakha ah zatlang paih he zuamcawh paih hi champion a co than. Cu he cun voi 9 hrawng bual a co cang. Mah vialte aa paih chung ah voi hnih lawng a sung. Cucu, 2014 kum Indianapolis ah tuahmi Chin National Day ah Tial Cung Thang nih a rak tei. Avoi hnihnak cu 2015 kum Indianapolis thiamthiam ah tuahmi Chin National Day ah Kap Tawng nih a rak tei i a sung.
World Champion tiah auhmi Rung Lian Ceu hi a khaan pe 5′ 8” a sang i pound 202 hrawng a rit. Nagaland Champion cotu Venuzo hi a khing pound 220 a rit i a khan pe 6′ 2” a sang. Rung Lian Ceu nih a tei lai maw?
About The Author
