Naypyitaw, Pyinmana Peng, Bomahtan Tlang SAC Ralkap Sakhaan Lak Kahdohnak Ah Meithal Zuun 9 An Lak Khawh
The Chinland Post | 2023 August 16 — Naypyitaw Council hmunhma, Pyunmana peng, Bomatan tlang sakhaan cu PDF phufonh nih an lak khawh i kahdohnak chung ah meithal zuun 9 an lak khawh, cu sakhaan lak kahdohnak telh in ni 3 chung ah SAC ralkap 50 nak tlawm lo an thi i PDF chungtel 3 an nunnnak a liam, 4 an i hliam i 2 hi an hma a fak ngai tiah PKS-PDF 1004 Battalion nih thawng an thanh.
August 10 zinglei sml 6:49am ah SAC ralkap thazang 20 hrawng nih hmunhma an khuarnak Pyinmana peng, Bomatan tlang ah a um mi SAC LID 411 sakhaan cu PDF chungtel pawl nih an kah hna i 15 nak tlawm lo an thi, 3 hi an zaam caah an luat bantuk in sakhaan an lak hnu zinglei sml 9:00am le 10:00am kar ah Brigade 606 nih bawmhnak pek ding in an rak ṭum caah a rak raa mi SAC ralkap pawl cu kuttuah bomrap, meithal in an kah hna caah SAC ralkap 4 an thi, 5 an i hliam hnu ah an kir ṭhan tiah theih a si.
August 10 chun sml 1:00pm hrawng zong ah bawmhnak pek ding in SAC ralkap mawṭaw pawl an rak ṭum ṭhan caah Nannaysan lonh deuh ah kuttang bomrap in an puah hnawh hna i SAC ralkap a thi mi an tam, August 11 zinglei sml 6:00am ah hliam a tuar mi PDF chungtel pawl an thlop hna lio ah SAC ralkap 35 hrawng an rak kai ṭhan caah PDF pawl he kahdohnak mins 30 hrawng a chuak.
Cu bantuk in Pyinmana peng, Taungminpu tlang le Taungminyuama karlak ah PDF chungtel pawl le SAC ralkap hna karlak ah sml 1 hrawng kahdohnak a chuak ṭhan i SAC ralkap 10 nak tlawm lo an thi tiah theih a si.
Cun August 12 ah Naypyitaw Council hmunhma, Pyinmana peng, Boma lei ah SAC ralkap thazang 85 hrawng an rak luh ṭhan caah Yepu tlang ah kahdohnak a chuak ṭhan i SAC ralkap 5 nak tlawm lo an thi, 5 leng an i hliam tiah theih a si.
Kahdohnak pawl chung ah PKS-PDF 1004, Tandaung chaklei hmunhma Special Force hna bawm in kahdohnak an tuah hi a si i August 10 in August 12 tiang ah kahdohnak voi 7 a chuak i SAC ralkap 50 nak tlawm lo an thi, 40 nak tlawm lo an i hliam bantuk in meithal zuun 9, Grenade, kuanbawm, walky talky le kuan cheukhat an lak khawh.
Kahdohnak chung ah PDF chungtel 3 an nunnak a liam i 1 fak ngai in aa hliam, 2 thinphan awk um tuk lo in an i hliam tiah PKS-PDF 1004 nih an langhter.
August 13 ahcun SAC kahdohnak vanlawng pawl nih Pyinmana peng ni chuahlei Boma khuate lei ah bom an thlak caah mipi inn tampi a rawk tiah an langhter.
