Naypyitaw, Vanlawng ṭumnak lamcung ah bom voihnih a puak
The Chinland Post | 2022 June 15 – Naypyitaw i vanlawng a kalnak lamcung a simi Yazatinkaha lamcung ah June 14 ah lam aa chokmi a checktu Traffic Police le mipi thuam in hriam aa tlaihmi pawl bom voihnih puah an tong tiah Myanmar Now nih a langhter.
Layway peng, Bawdekung khuate, Traffic light pawngah thazang 30 hrawng SAC ralkap pawl zohfelnak an ngeih lioah bom kan puah hnawhmi hna an si tiah a puahtu phu nih an chim.
Zingka sml 9 ah bom a puak i mi pakhat nih live a thlah lioah a dang bom pakhat kan puah chap tiah Naypyitaw hmunhma hriamtlai phu nih Myanmar Now ah an chim.
“Anmah chungin pakhat nih live a thlahnak link kan hmuh i kan zoh. SAC ralkap pawl bom pawng an um lioah an puah hnawh hna caah an tuar ngai lai” tiah a puahtu chungtel pakhat nih Myanmar Now ah a chim.
Bom voihnih pehzulh in a puah ruangah SAC ralkap lei in a hliammi an um kho men nain a fiang in theih a si lo tiah an langhter.
Facebook ah hmuhmi video ning ahcun a voikhatnak a puah lioah Traffic Police pawl ngeihmi mawṭaw thlalang a rawh kha hmuh khawh a si.
A puahnak hmunhma hi USDP party Headquarter zung he meng 2 hrawng aa hlatnak hmun ah a si i Naypyitaw Vanlawng certual he meng 9 aa hlat.
Myanmar Now nih a hmuh khawhmi data ning ah, Traffic Officer mawṭaw 1 a rawk, minung cu an i hliam lo tiah a langhter.
Bom a thianhtu ralkap pawl thawng kan thanh hna lioah kuttuah bom pakhat a puah chap hi a si tiah Palik pawl an cakuat chungin hmuh khawh a si tiah a langhter.
SAC uknak a ṭhawnbiknak Naypyitaw hi cawlcanghnak a hartuk ko nain ralrinnak ṭha te he kan doh hna lai tiah Naypyitaw hmunhma khuachung kahdohnak a tuahtu phu nih Myanmar Now ah an chim.