Ngakchia Paruk Lungkua Chung In An Chuahpi Khawh Cang Hna
City Hunter| 2018 July 8| Tham Luang lungkua ah aa taapmi ngakchia 13 lakah minung paruk cu suimilam 7:30 hrawng ahkhan leng ah an chuahpi khawh cang hna. Nunchanhnak rian chikkhat an i din chung rih, a rauh hlan ah an thawk than te lai tiah theih a si.
Lungkua chung in leng ah an chuahpi khawh cangi ngakchia paruk cu lungkua in sii-inn motor pakhat nih a phorh colh hna i helicopter cung ah an kaipi colh hna. Khan (meng) 50 tluk aa hlatnak Chiang Rai sii-inn pakhat ah helicopter nih dengteo in a phorh colh hna.
Lungkua chung in a hmasa bik a chuahpimi ngakchia hna cu Chiang Rai sii-inn an phakpi cang hna. A hmasa bik a chuakmi ngakchia kum 13 pakhat cu midang nak naihniam deuh in siibawi te nih an zohfel. Lungkua chung in chuahpinak ah ngakchia hna hi phuli ah an then hna.
Hi kong he pehtlai in American President Donald Trump nih, “Ngakchia zapi lungkua leng ah damte le himte in an chuah khawhnak ding American zong nih Thai cozah he i bawm in naihniamte in rian an tuan” tiah Twitter ah a tial.
Chanhchuahnak rian ah ramdangmi tilio thiam 50, Thai tilio thiam 40 tiang thazaang an chap. Lungkua chung ah a taaangmi ngakchia chanchuahnak rian cu suimilam 10 le 12 kar chung a rau kho tiah chanchuahtu hna nih an tuakdamh.
Thawngfianternak tuah an thawk cang. Nunchanhnak rian ah a biapi in hruaitu Chiang Rai pengkomh lutlai nih media pawl ton biaruahnak a ngeih hna. Cu ton biaruahnak ahcun ngakchia hna ngandamnak a tha tuk ko tiah a chim.
Reuters le AFP thawnglatu hna nih ngakchia paruk lungkua leng ah chuahpi an si cang tiah an tial nain Chiang Rai pengkomh lutlai nihcun ngakchia pali lawng chanhchuah an si rih, an zapi te in sii-inn ah kan kalpi colh hna. Hi chanchuahnak rian cu a taangmi suimilam 10 chung ah lim khawh ding kan i ruahchan tiah a chimchih.
Thawngfianternak an tuah dih hnu ah nunchanhnak rian a tuanmi tuanvo ngeitu upa pakhat nih nun chanhnak rian kan ngol rih. A ruang cu oxygen dur pawl kan hman dih cang caah a si. Zeitik in dah nunchanhnak rian kan thawk lai cu ka chim kho rih lo. Asinain suimilam 10 in 20 nak tam cu nan hngak hrimhrim lai lo. A taangmi suimilam 20 chung ah an zapite in leng ah chuahpi khawh ding in kan tawlrel ko lai” tiah a chim.
July 8 zingka suimilam 10:00 ah tuahmi thawngfianternak ah Chiang Rai pengkomh lutlai nih, “Atu thiamsang tilio thiam hna cu tu zingka in lungkua chung ah ngakchia pawl chanhchuah ding in an lut cang. An zapite in chanchuah ding an i zuam. Ti lio thiam pawl ngakchia hna umnak an phaknak ding suimilam 5 asiloah 6 chung a rau lai. Siibawite zong nih ngakchia hna an ngandam ko, chuahpi khawh an si cang an ti. Ngakchia pawl lungkua chung ah nungte in a hmutu British tilio thiam phu hna zong lungkua chung ah an lut cang” tiah a chim.
Ngakchia pawl chanhchuahnak caah lungkua chung in an rak chuahnak ding hi a tlawm bik suimilam 8 hrawng a rau lai. Thai ram chaklei hrawng ruah a fak lai tiah khuacaan thanhtu nih an thanh caah atu bantuk in chanchuahnak rian an thawk colhnak hi a si.
Asinain, an tuakciami ning nak tuan deuh ah minung 6 an chuahpi khawh cang hna. A dang zong a rauhhlan ah an chuahpi khawh dih cang hna lai tiah zumh a si.
July 6 zingka ahkhan ngakchia pawl lungkua chung ah oxygen dur a pechaantu Thailand ti ralkap bawi hlun a simi tilio thiam pa Gunan cu lungkua chung ah a thi. Ngakchia pawl oxygen dur a pekchanh hna hnu a kir lei ah oxygen dur aa kenmi nih a dihtak ruang ah a thi tiah theih a si.
Hi ngakchia 13 cu June 23 ahkhan lungkua chung ah an luhnak in atu bantuk in an taap nak hi a si.
Ref: BBC, Reuters, 7Day News
About The Author
