July 25, 2024

Ni 12 Chung Ah Ralkap Sakhaan 3 Kan Lak Khawh Tiah CNDF Nih An Thanh

0

The Chinland Post | 2023 November 20 — Sagaing ramṭhen le Chin ramkulh chung um ralkap sakhaan 3 cu kan lak khawh i hriam tampi zong kan lak khawh tiah CNDF nih November 17 ah thawng an thanh.

November 3 in November 15 tiang Sagaing ramṭhen chung ah a um mi Khampat, Myauksi le Chin ramkulh, Tibual ralkap sakhaan hna an lak hi a si.

November 3 ah Tamu peng, Khampat palek sakhaan cu an kah i November 5 ah an lak. Cun cu ni ṭhiamṭhiam ah khuachung ah a um mi LIB 228 sakhaan an kah ṭhan i November 7 ah an lak tiah theih a si.

Kahdohnak chung ah ralkap 5 an thi i 40 leng India ram lei ah an zaam i meithal phun 10 le kuanzen pawl zong an lak khawh tiah cathanh ah an langhter.

CNDF cathanh ning ah, November 14 zaan ah Chin ramkulh, Falam peng Tibual sakhaan cu Drone, Hriamngan, meithal hna bawm in sml 4 leng an kah hnu ah ralkap pawl nih sakhaan an zaamtak caah sakhaan kan lak khawh tiah an thanh.

Sakhaan zohfelnak an va tuah lio ah, ralkap 2 an thih kha kan hmuh i meithal zuun 7 le kuan pawl, hriamngan pawl le eidin pawl kan lak khawh tiah cathanh chung ah an ṭial.

Cu sakhaan lak kahdohnak chung ah mipi hriamtlai 2 an nunnak a liam i 2 an i hliam tiah CNDF nih an thanh.

Chin ramkulh, Falam khua le Rihkhawdar, India-Myanmar pehtlaihnak lam ah a um mi ralkap sakhaan 2 cu November 14 thawk in CNA hruai mi Chin hriamtlai phu pawl nih an kah i sakhaan an lak khawh hnu ah an khangh beh.

Falam peng ah ralkap sakhaan 2 lawng a tan cang caah la kho ding in kan i zuam lai tiah CNDF nih an thanh.

About The Author

Na ruahning rak langhter ve.. (Leave a comment)