Ni 15 chung kahdohnak ah SAC ralkap 40 an thi tiah CDF-Hakha nih a thanh

0

The Chinland Post | 2022 April 15 – Sagaing ramthen, Kalaymyo in Hakha lei ah a rak kaimi SAC ralkap pawl le CDF-Hakha, CNA karlak ah Match 17-31 tiang ni 15 chung kahdohnak a chuak. Cu kahdohnak ahcun SAC Ralkap 40 an thi, CDF-Hakha in mipi hriamtlai 1 a ban ah hliamhma a tuar tiah CDF-Hakha nih a thanh.

SAC ralkap pawl cu March 27 Ralkap Ni tanhding ah Hakha in  Naypyidaw lei ah Gangaw lam zul in March 17 ah thazang 217  hrawng he an i thawh. SAC ralkap pawl cu March 17 Nipi khuapawng an phanh ah CNA le CDF-Hakha fonh in an kah hna. SAC ralkap pawl Zokhua le Nipi karlak an phak March 18-19 ah CDF-Hakha le CNA fonh in kahdohnak an tuah than caah SAC ralkap 10 an thi tiah theih a si.

CDF-Hakha, CNA le SAC ralkap hna cu March 21-31 tiang, Zokhua pawng, Rungtlang, Zokhua Tlang, Tinam Tlang, Ruavan Tlang, Lamtuk khuachung luhlai, Lamtuk le Lungcawi kar le Lungcawi khua hna ah tiin ni 10 chung kahdohnak a chuak than. Cu kahdohnak ahcun, SAC ralkap 30 an thi chap tiah CDF-Hakha nih thawng a thanh.

SAC ralkap nih an hawile a thimi ruak pawl cu CDF-Hakha le CNA nih hmu kho hna hlah seh tiah zaan an riahnak hmun ah mei in an khangh chih. Sihmanhsehlaw, an ruah pawl cu hlo dih kho lo in an ruh pawl a taang rih tiah an cathanh ah an langhter.

SAC ralkap pawl cu Tinam khua an phak lio ah mipi inn 9 an khangh tak i khua chung ah dohpoh in hriamngan an kah caah khuami hna cu himnak ah an rak zaam dih tiah theih a si.

About The Author

Na ruahning rak langhter ve.. (Leave a comment)

%d bloggers like this: