Nichuah lei Ukraine Lyman khua cu Russia nih a lak cang
The Chinland Post | 2022 May 30 – Nichuah lei Ukraine ah a ummi Lyman khua cu a zapi tein kan tlaih dih cang tiah Russia Ministry of Defense nih May 28 ah a chim.
Lyman khua hi Severodonetsk khua hnulei tlanglawng lam a tonnak khua a si.
Donetsk People’s Republic ralkap pawl le Russia ralkap i bawm in Lyman khua hi kan lak khawhmi a si tiah Russia Ministry of Defense in biachimnak nawl a ngeitu Igor Konashenkov nih a chim.
“Van ralkap nih Ukraine jet vanlawng 2 an thlak khawh. Raltuknak chungah Russia ralkap nih Ukraine helicopter pakhat a thlak khawh” tiah fek tein a chim.
Lyman khua caah Rusisia le Ukraine cu ni sau ngai an i kap.
May 27 ah Russia nih Lyman khua zapi deng in a lak i Ukraine ralkap nih khua hnulei meng 12 aa hlatnak Slovyansk khua ah Russia ralkap lut kho lo ding in an kham hna tiah Ukraine cozah nih a chim.
Bakhmut le Lysychansk khua hna i Ukraine sakhaan pawl hrawh khawhnak ding caah missiles pawl hman a si tiah Russia nih May 27 ah a chim.
Mah khua hna hi Russia nih naih tein kahdoh a tuahnak Severodonetsk le Lysychansk khua caah a biapimi lam an si.
Russia ralkap pawl hi Ukraine ram a dang hmunhma hna ah Ukraine ralkap nih fak piin kahdoh an tong i Kyiv khua an kahnak hmunhma in an kir ṭhan.
Cu hnuah, Donbas hmunhma lei ah kahdohnak biatak deuh in a tuah hi a si.
About The Author
