Nihin tiang Chin miphun 21 an thi, 179 an tlaih cang hna: CHRO
Salai Tluangkipthang— 20 April 2021 | Chin Human Rights Organization (CHRO) nih khawmhsuat nak a tuah mi chung in, Ramkomh Kawlram pumpi in Chin miphun a thi mi hi 21 an si cang i, tlaih khih mi hi 179 tluk an si. Cun, tlaih khih ding ah warrant an chuah mi hi 30 an phan cang tiah CHRO nihcun, an thanh.
Ralkap nih hramhram in Nawlngeihnak lak an timh in, mizapi nih duhlonak an langhter mi zarh 11 a tling cang. Monywa ah hruaitu a si mi, Ko Wai Moe Naing, cu a mawtaw cycle cit mi an pah hnu ah, an tlaih i, an tuk velh len. Tulio Kawl Titoih puai lio lawng ah, Ralkap kut in a thi mi hi minung 26 an si.
Mobile phone in internet an phih nak ni 35 a si cang i zaantlai ah internet phih peng rih. Committee Representing Pyidaungsu Hluttaw (CRPH) nih anmah ser mi Federal Democracy cahren (charter) ning in National Unity Government (NUG) cu an dirh.
Kanmah Chin miphun chung in, Dr. Lian Hmun Sakhong le Dr. Sasa zong CHPH nih ser mi NUG ah an i tel. Dr. Lian cu Federal kong he pehtlai mi ah, Minister rian an pek i, Dr. Sasa cu ram kip pehtlaihnak minister rian le NUG i chimrel nak nawl ngeitu sinak zong an pek chih.
Hluttaw Speaker hlun Mahn Win Khaing Than, Karen miphun cu Prime Minister rian an pek. Cun, Kachin National Consultative Assembly president simi Duwa Lashi La cu Vice-president rian Khing a si. President hlun Win Myint le State Counselor Daw Aung San Suu Kyi cu an rian thing Khine an si.
April 18 tiang ah, Assistance Association for Political Prisoners (AAPP) nih khawmhsuatnak a tuah mi ning in 737 tluk Ralkap nih an thah cang hna. Nihin tiang ah tlaih khih mi hi 3,229 a phan cang. Cuchung ahcun, minung 75 bia an caih cang hna i, biakhiahnak tuah an si cang. Cun, atu tiang ah 930 tlaih ding mi (arrest warrant) an chuah cang hna. Hi chung ah, an hmaithlak mi hna hi pro-democracy activists, political party hruaitu, cozah riantuantu upa, sibawi, mithang le social media ah mi a hip kho tu pawl an si.
CHRO nih April 17 ah, National Unity Govt. dirh a sinak kong he lungtlinpi nak cathanh zong an chuah.