Nikhat chungah Covid mizaw thar 15 kan hmuh tiah SAC nih a thanh
FILE PHOTO: A woman holds a small bottle labelled with a "Coronavirus COVID-19 Vaccine" sticker and a medical syringe in this illustration taken October 30, 2020. REUTERS/Dado Ruvic/File Photo
The Chinland Post | 2022 August 3 – Myanmar ram, nikhat chungah Covid-19 mizaw thar 15 kan hmuh ṭhan chap tiah SAC kuttang ngandamnak zung nih August 2 zaanlei ah a thanh.
A luancia sml 24 chungah Laboratory sample 5,289 check a si i mizaw thar 15 hmuh a si caah zawtnak rungrul 0.28% a um tiah a langhter.
Covid-19 zawtnak in a thi chapmi an um lo caah Covid-19 in a thi cangmi minung 19,434 an si tiah a thanh.
Myanmar ram pumpi in Covid-19 zawtnak aa chawnhmi 614,128 an um i zawtnak in a dam cangmi 592,922 an si tiah cathanh ah a telh chih.
Asinain a cunglei thanhmi hi CDM sizung pawl, CDM Laboratory ah check mi aa tel loin SAC kuttang ralkap sizung lawngah check mi a si caah zawtnak i chawnhnak le a thimi he pehtlai in a fiangmi cazin theih a si lo.
NUG kuttang ngandamnak zung nih cun Covid-19 zawtnak thar hi a zarh chung te ah vawlei pumpi ning in a karh tiah WHO cathanh charhchan in thawng a thanh ve.
Southeast Asian chung zongah Covid-19 zawtnak 20% a karh i a thimi 16% tiang a kai. Mizaw thar hmuhnak a karh lio caan ah Covid-19 zawtnak B.A.5 le B.A.4 a ngeimi an tam tiah a thanh.
SAC kuttang ngandamnak zung nih Covid-19 zawtnak i chawnh le a thimi cazin nifatin a thanh kha hmuh khawh a si i atulio caan hi i chawnhnak 1% hmanh a um ti lo i a thimi an um lonak ni zong a um tiah a chim.
Cu lengah, Myanmar ram ah Covid-19 mizaw thar an tlawm tuk cang le a thimi an um tuk ti lo caah Marh 16 thok in minung 400 tiang i but khawh a si cang tiah SAC ngandamnak zung nih a rak thanh.
Myanmar ram ah hramhram in uknak lak a si hnu kum 1 le cheu leng caan chungah ram buainak, sipuazi, zatlang nun le mipi ngandamnak i zohkhenhnak a lamkip in a ṭumchuk.
NUG nih a thanhmi Covid-19 zawtnak he aa pehtlai mi cathanh ahcun sizung kai ding a si ko nain a kai kho lomi, online i aa thlopmi, SAC nih a thimi cazin dik tein a thanh lo caah SAC nih Covid-19 zawtnak a tawlrel dan hi a ṭha lo tuk tiah a chim.
Cucaah mipi hna nih Covid-19 khamhnak sii i chunh hrimhrim ding le Covid-19 he pehtlai in zulhpung vialte pehzulh rih ding a biapi tiah NUG nih forhfialnak a tuah.
About The Author
