Nilen Hlasak Lio Laksawng A Hmuh Dingmi An Pek Lo Pin Ah A Manager Nu An Hro I An Thawl
Salai Elvis| 2019 February 28| Chin Miphun Ni February 20, Hakha ah Chin ramkulh hluttaw zungthar hunnak tuah lio ah hlasakthiam Ni Len Par Mawi cu hlasa dingin sawm a si bantuk in hlasak man le President tel in laksawng an pekmi zapi tuanvo ngeitu nih an pek lo pin ah Nilen i a Manager nu zong an rak hro i an rak thawl tiah kan theih.
Hluttaw zung tuanvo ngeitu lei nih hlasakman laksawng 50,000 lawng kan in pek khawh lai an timi tel in President nih laksawng 50000 pekmi le avoi hnihnak a sak lio ah laksawng 50000/- ahmuh ding a zapi ah ks. 150,000 pek lo in an um hi a si.
“Nilen a chuahkehnak Laitlang, Hakha khua ah hi bantuk thil ka ton lai ding a ruah zong ka ruat bal lo. Kawlram chung ah Nilen hlasak a kalnak ah ka zulh a tlawm ti lo. Hi bantuk thil zong hi ka tong bal lo. A tu bantuk kan ton hi cu avoi khatnak bak a si. Keimah an ka timi cu va chia ko usih law Nilen zei an rel lo bak a si ti ka ruah ko. A taktak ngai lo ah cun an kan pek ding phaisa Amount hi Nilen puai khat a hmuhmi i cheuhra cheukhat hmanh a si lo. Kan ui ding zong a um lo. Asinain, riantuan ningcang in keimah ka rian a si ve caah Nilen hlasak man ka kut ah a phak ding kha a si. Ni Len nih zawnruahnak taktak in hla a sakpiak mi hna zei an relpiak lo a si ko. Zung nganpi a si ko nain riantuantu an mak lo tuk. Khuaruahhar an si” tiah Nilen a Manager nu nih a lungfahnak a langhter.
Nilen a Manager nu hi MNTV (DVC) ah Producer Director (PD) le Myanmar Idol ah Reality Producer a tuan liomi a si. Cun Nilen’s Personal Manager zong a tuan chihmi a si.
“Hakha Chin Miphun Ni hlasa dingin Fiakfairock Band nih hlasak an ka cah i tlunding kaa tim. A tlung lai ti an theih le maw a si hnga Hluttaw zungthar hunnak tuanvo ngeitu nu Ngun Cin timi nu nih Phone a chawnh ve i rampi President le khuallian tlung ding zong an si caah kan in uanthlar mi zong na si caah Hluttaw zunghtar hunnak ni ah hla rak kan sakpiak law kan duh ko. Tangka zong kan ngeih lo caah 50000 te lawng kan in pek khawh lai an ka ti. Asinain, tangka kong cu a poi ah ka chia lo, kei cu Fiakfairock lei nih an ka cahmi ka si caah ka ti hna tikah Fiakfairok lei tuanvo ngeitu hna kha rak chawn hna u ka ti hna. Cu tikah voi tamtuk an kan chawnh i a caan aa rem le an sakpiak te hna lai tiah an leh hna. Kei zong nih caan he aa rem ko ah cun e ka ti ve ko i hla cu fung hnih ka sa i laksawng an ka pekmi tangka cu an kan pe duh ti lo” tiah Ni Len Par Mawi nih The Chinland Post ah a chim.
“Hla cu funghnih ka sa i President le a nupi maw si, mi pakhat nih laksawng 50000 veve an ka pekmi a um i kan tin lai kan ti tikah a ka zultu ka Maneger nu nih laksawng an in pek mi tangka ka la rih lo a ka ti i a va kir than. Kanmah cu February 21 ni ah a kir colh ding kan si caah khoika hmun hla kan saknak paoh ah kan sak hlan le kan sak khawhka ah laksawng an kan pek ta peng mi a si caah ka Manager nu cu a ka zul peng mi a si caah cu hlan bantuk in a ruah. Tangka tlaitu si an timi Tedim nu sin ah a va kal a va hal tikah mah nu nih cun a rak thawl. Ka Manager nu cu hi thil a ton bal lo caah a thin hung tuk. Keimah tu nih a hmai ka khap ve lo. Tangka kha ka ruat lo ka Manager nu an ti ning kha ka ruat cang. Hlasa ding kan si rih caah va um ko seh ka ti. Zungrian tuan mi ka u nu Nomi sin zong ah Ni Len cu tangka rak kan pekpiak than ko an rak ti rua nain ka u nu nih a rak la duh lo. Hluttaw zung in Phone a ka chawn lengmang mi nu nih cun Ka pa sin ah tangka kan pek ko mi a la duh lo tiah an rak ti ka pa nih hi bantuk kongah cun kaa ceih ngam lo tiah a rak leh hna i ka pa lila cu tangka kan pek cang ko tiah Hluttaw Speaker Pu Zo Bawi sin ah rak kan chimhpiak an rak ti nain ka pa nih a duh lo. A tu hnu ah cu tangka cu rak ka pe hna seh law cohlan kaa tim ti lo” tiah Ni Len nih a chim.
Hi kong he pehtlai in Ni Len hlasak a rak sawmtu Hluttaw zung tuanvo ngeitu Pi Ngun Cin cu The Chinland Post nih phone in pehtlaihnak kan tuah tikah “laksawng tlaitu cu Pau Suan Cin a si i amah hal u law a theih bik lai, kei cu a chim awk ka thei lo” tiah an kan leh. Asinain laksawng tlaitu Pau Suan Cin cu zung phone in pehtlaihnak kan tuah len nain pehtlaih khawh a si lo.+++
About The Author
