Nilen Nih A Hmasabik Single Song A Sakmi MTV He Aa Chuah Zau Lai
Tawk Tling Thang| 2019 February 18| Myanmar Idol Top -5 tiang aa telmi Nilen Par Mawi @Nilen nih a hmasabik aa chuah ding mi single song “ေပ်ာ္ပါေတာ့” Music Video cu tuzarh chung ah a thlah cang lai tiah theih a si.
Nilen nih MTV he aa thlakmi Single Song “ေပ်ာ္ပါေတာ့…” timi hla aa chuah ding mi kong ah The Chinland Post nih pehtlaihnak kan tuah i atu bantuk in a chim.
“Atu kaa chuah ding ‘ေပ်ာ္ပါေတာ့’ timi hla hi Single Song a si, Hlaphel (Album) a si lo. Hi hla hi USA ummi December Thiam Mawi nih a phanmi a si i Keimah nih sakpiak ding ah bawm a ka hal caah ka sakmi a si. Hybird Workshop Studio ah kaa khumh i Music Produced hi Saya Okka Oo Tha nih a ka tuahpiak. Cun Vocal Coach a ka tuanpiaktu cu Tr. Tracy a si. Keimah duh in thimmi hla a silo. Hla tialtu nih bawmh a ka halmi a si caah zawnruahnak he ka cohlan vemi a si. Hla phan tu nih a ka pek kaa ah cun a hla hi kaa ziak tuk lo nan Saya Okka Oo Tha le Tr. Tracy nih music arrangement thate in an vun ka tuahpiak hnu ah kaa van i ziak deuh i ngaih nuam, Sak nuam te zong a si. Zuunhla a si bantuk in hla dai te a si. A hlei Kaa lunghmuih khunmi cu a Music Video hi a si. A ruang cu minung tampi thazaang chuah in kan buaipi mi a si caah kan re a thei khun. Asinain tu lio Kawlram minthang Director, Cameraman, Stylist, Hair & Makeup Artists, Starings pawl nih bia tak tein an ka bawmh caah kaa lung sii ngai ngai. Hi hla i Producer zong hi Hla phantu December Thiam Mawi thiamthiam a si.”
“Keimah duhnak ahcun February 20 ni ah chuak kho seh ti ka duh. Asinain, Music Video lei edit tlawmte aa duh rih caah chim khawh cu a si rih lo. A chuah cangka keimah ka personal facebook account ah free in ka thlah te lai. Cucaah, atu te in follow tuah cia khawh zong ka si” tiah a chimchap.
Atu hi Nilen cu amah pumpak phanmi Kawl hla (own tune) Single Sing zong studio ah aa khumh cuahmah lio a si. Atu aa chuah ding mi “ေပ်ာ္ပါေတာ့” a chuah dih hnu pi ah duhsah deuh in a chuak te lai tiah kan theih.
“Atu keimah ka phanmi Kawl hla (own tune) hi cu duhsah in MTV he ka chuah te lai. Mitthli he keimah intuarmi ka phanmi a si caah ka si khawh chung biatak te caanpek in a tha bik si ding ah i zuam ka duh” tiah The Chinland Post ah a chim.
Nilen nih MTV in aa chuahmi single song “ေပ်ာ္ပါေတာ့” timi hla cu tutan Hakha ah tuahdingmi Chin Miphun Ni ah a tumtu hna he an tlamtlin ahcun sak aa tim tiah kan theih.
Nilen Parmawi cu January 25 (Kum 24 tlinnak) a birthday caah ‘We Love Nilen’ timi thapetu phu (fan group) minung 20 tluk nih tangka an ithawh i sing thong man a simi Motor dawhte Toyota Celica (Piangka) an cawkpiak tiah theih a si.
February 20 zan Chin Miphun Ni, Hakha Vom Tu Maung certual ah Fiakfairock Band tawlrelnak in hlasatu ding hna cu; Nilen Par Mawi, Aa Thang Composer, Tawk Men, Biak Tha Cuai, Mercy, Van Siang Mang, Cung Hlei Lian le Fiakfairock band in hlasak thiam dangdang an si lai.
Nilen Hi Myanmar Idol hlasak zuamnak ah Top-5 tiang a phanmi a si. Ngaknu Nilen Par Mawi cu Bachelor of Engineering of Electronic Communication (BE.EC) in Yangon ah sianginn a dih mi a si i Make Me Beautiful timi tamhmoih lei zuamnak zongah Myanmar Ram Pumpi huap in aa zuam i a thiambik pathum thimmi tiang aa telmi a si.
Amah hi kum 24 a si i Senthang peng Dongva khuami Pu Hrang Vung le Pi Thluai Iang @Thote nih an ngeihmi fanu hniang bik a si. Nilen Par Mawi hi Eain Mat Sone Ya Season-9 i 1st Runner Up a rak hmu mi Nicholas Dawt Kam Sang a far nu a si. Hi bantuk in fim cawnnak lei zongah siseh, zungmawi thiamnak lei in siseh hlasaknak lei zong in siseh bochanmi a si i miphun dang hna lakah Chin miphun mithmai a kan ngeihtertu hlasak thiam pakhat a si. +++
About The Author
