Ningcang tein Australia Visa Kan Hmannak Hnga Nawl Kan Duh Hna_Renny Ceu Lian Mang

Dean Smith le Renny Ceu Mang (ahmai thu)/Renny Ceu L Mang fb

TCP Hakha| 2020 January 18| Australia Chin Federation (ACF) Chairman, Australia Senator Dean Smith Chin ram a rak tlawnnak ah a rak zulmi Pu Renny Ceu Mang nih Senator Dean Smith nih biacah bang in Australia ah Chin mi zalong tein le fawi tein visa he kan luhchuah khawh lengmang nak hnga ningcang tein Visa nan tuah i Australia zongah phungninglo in nan um nak hnga lo The Chinland Post interview ah a chim.

“Senator Dean Smith nih Perth ah Australia um Chinmi Upa, Biaknak lei Upa dihlak a kan ton I Australia Cozah kan chimpiak cang hna I Visa fawi tein nan ngah cang. Ningcang tein nan hmannak lai. A hlan ah Tuluk , India le Korea pawl visa kan pek hna i Australia ah phungning lo in an um beh, an tlau beh lengmang. Cun bantuk pakhat hnih ruangah an miphun ningpi in Visa ngah an hartuk cang a kan ti. Chim ka duhmi cu atu Laimi tampi Australia kan kal kho cang. Voikhat sok ah thla (3) voihnih sok ah thla (6) tbk an kan pek I chungkhar unau khrihfabu kan itlawn khawhmi hi lawmh a um tuk. Ningcang lo in mah Visa kan ngahmi kan hman sualnak hnga lo nawl kan duh ko hna” tiah Renny Ceu Mang nih The Chinland post ah a chim.

Australia a phan cangmi rammi sinak zong pek an herh lengmang cang caah fawi tein rammi sinak kan ngah khawhnak hnga Senator Dean Smith nih aa zuam cuahmah ve. Hi kong he pehtlai in “ Kawlram in Chuahhrin thanhca (Birth Certificate) ngei lo in Australia Chinmi an rak phak lengmang tikah mithalo he aa pehtlaimi an si sual hnga maw tiin kan dirhmun a rak zohfelmi a si. Birth certificate kong hi Australia rammi sinak peknak ah a biapi ngaimi a si.  Hi kongah Cozah chimrel ngeitu Minister Seo Thet zong nih kan chuah ka in Birth Certificate pek tawn an silonak kong le hmailei a herhningin tawlrel a herhnak kong biaruahnak an ngeih khawh caah kan I lawm khun” tiah Australia Chin Federation (ACF) Chairman Pu Renny Ceu Lian Mang nih  The Chinland Post ah a chim.

“Cun Chin ram hi zu an ding ngai an ti caah Kachin ram ah rithaisii an eidin bantuk dirhmun kan si sual hnga maw tihi kan rak hlathlaimi zong a si. Nizan zong Thantlang ah kan va kal. Lampi ah cycle ningcang lo in a mawngmi, aa khongdenmi, minung pathum zong in aa citmi hna tampi ka hmuh hna I ka lung a tha lo ngai” tiah a biapeh ah a chim.

Australia ram Victoria ramkulh ahcun Chin ca (Hakha) cawn khawh a si. Australia Adelaide, Queensland, Perth le Melbourne khualipi hna ah Chin mi tambik um a si i Chinmi minung 10,000 fai kan um lai tiah tuak a si. +++

 

Na ruahning rak langhter ve.. (Leave a comment)

%d bloggers like this: