NLD cozah kum 5 chung ah Chief Minister 4 an rian in dinhter an si

Salai Bawi Lian Sang & TCP Hakha | 2020 September 4 — National League for Democracy (NLD) cozah nih kum 5 chungah Chief Minister pali (4) rian an dinhter cang hna.

A hmasa bik, 2017 kum ah Mon State Chief Minister U Min Min Oo, 2019 kum ah Tanintharyi Chief Minister Dr. Lei Lei Maw le tutan 2020 ah Kayah Chief Minister U L Phaung Sho cu eihmurnak he pehtlai in an rian in phuah an si. Nain, Ayeyarwady Chief Minister Mahn Johnny cu 2018 ah a ngandam lo ruangah aa dinhmi a si.

Mon ramkulh Chief Minister hi amah lawng silo in, Thanchonak lei tlaimi Minister he an si. An pahnih tein President Htin Kyaw sin ah dinnak (resignation) an hal caah, kan cohlan hna timi cathanh cu cozah nih an rak thanhmi cu President Office Website ah hmuh khawh a si.

Nain, mi cheukhat nih NLD cozah chan chung ah dinhter an duhmi hna cozah upa poahpoah cu ngandamlonak timi min bunh in pei an dinter tawn ko hna cu tiah soiselmi zong an um len. 

Chief Minister U Min Min Oo, Mon State

Cun, Tanintharyi Chief Minister Dr. Lei Lei Maw hi cu ziknawh le eihmuarnak ruang ah a si tiah cozah nih dirhmi ziknawh eihmuar dohtu bu (Anti-Corruption Comission) nih biakhiahnak an tuahmi ning in an phuahmi a si. A nih hi, sualnak a tuah tiah an hmuhmi ning in, kum 30 leng thongtla ding in biakhiahnak an tuahmii a si.

Cozah ziknawh eihmuar dohtu bu nih thla tampi hlathlainak an tuah hnu in, a rian an dinhter lawng silo in thong saupi thlak ding in biakhiahnak an tuah hi a si.

National League for Democracy (NLD) cozah kum 5 a tlin hnu, an caan a dihdongh lei ah a tu bantuk in Kayah Chief Minister Chief Minister U L Phaung Sho cu a rian tuanning cang le rian tlaihmi kong he pehtlai in Ramkulh Hluttaw nih phuah ding in bia an chah tiah theih a si.

Chief Minister rian phuahnak cathanh cu Ramkomh Kawlram President U Win Myint sinah ca an kuat hnu ah 2020 September 3 ah a rian in phuahnak ca a hun thanh hi a si.

Hi kong he pehtlai in, “Kayah Chief Minister U L Phaung Sho cu September 1 Pyine Hluttaw ah zumhawktlak a si lo tiah 2008 phunghram Upadi 263 (A) in sualnak a ngei tiah bia an ceih hi a si.

Kayah ramkulh Chief Minister U L Phaung Sho/Personal Facebook profile

Hi biacaihnak ah, Kayah ramkulh in Hluttaw palai dihlak 20 chung ah 16 nih a sual ko tiah hnatlaknak an ngeih. Nain, Hluttaw Palai a dang pali nih cun amah an Chief Minister cu an dirkamh tiah theih a si. Nain, Kayah ramkulh Chief Minister U U L Phaung Sho cu NLD cozah chan ah Ramkulh Hluttaw nih a hmasa bik Hluttaw Palai zapi hnatlaknak in an thlakmi a si. Kayah ramkulh Hluttaw ah Palai 20 an um. Cu chung ah NLD (9), Independent (1), Ralkap (5), USDP (4) le Kayah Democratic party (1) an si.

2020 June 18, 2020 Yangon ram Chief Minister U Phyo Min Thein zong Ramthen Hluttaw nih zumhawktlak lo tiah bia ceihnak an rak tuah bal nain Hluttaw tam deuh nih Phyo Min Thein lei an rak dirkamh caah biachahnak a rak um than lo tiah theih a si.

Ayeyarwady ramthen Chief Minister hi a rak i dinh hlan ah, 2017 January 6 ah Nay Pyi Taw lei ah meeting kai ding in a kal lio ah, mawtaw a rak i let tiah theih a si. Ayeyarwady Chief Minister hi cu a ngandamlonak ruang ah a dinmi a si.

Ramkomh Kawlram ah Ramkulh le Ramthen tiah 14 a um i cu chung ah cun minung 4 cu an rian in dihter an si. Cun, Rampi hruaitu lutlai Ramhun U Htin Kyaw zong U Win Myint nih a rak thlen.#

Ref: President Office, Frontier Myanmar, DVB TV News

Na ruahning rak langhter ve.. (Leave a comment)

%d bloggers like this: