NLD Hruaimi Chin Cozah Nih Chinram Ah Theng In Inn 400 Renglo An Hrawh Cang

0

The Chinland Post| 2019 August 20| NLD (National League for Democracy) party hruaimi Chin ramkulh cozah nih Chinram ah lamchunhnak theng (seh-gyi) in inn 400 renglo hramhram in an hrawh cang tiah kan theih.

Chin ramkulh cozah nih ekah 676 chung innhmun samh an timhmi chung ah phungninglo in inn a sa tiah an timi inn 135 cu 2019 August 20 zingka in Theng in hrawh hram an thawk. Tutan Hakha inn an hrawhmi hi avoi hnihnak a si.

2016 kum ah avoi khatnak inn 300 renglo theng (seh-gyi) in an rak hrawh. Cu an rak hrawhnak hmun cu Falam peng Bualpi khua ah a si.

Tutan Hakha ah inn 135 an hrawhmi le 2016 kum  lio Bualpi inn 300 renglo an rak hrawhmi cu cozah nih phungninglo in an sakmi a si tiin an hrawh.

Hi kong he pehtlai in Hakha khua upa pakhat nih, “NLD cozah thar a kai hnu in Chinram cozah nih avoi khatnak Bualpi khua ah inn 300 renglo hramhram in an hrawh. Cun, atu ah Hakha ah inn 130 hrawng hramhram in an hrawh than. Hi bantuk tuahsernak hi ruah tikah ngaih a chia tuk. Ralkap cozah chan lio hmanh ah hi bantuk inn hrawhpiaknak Laitlang ah a um bal lo” tiah The Chinland Post ah a chim.

“Tutan inn 135 sakmi hi inn pakhat saknak caah sing 50 (5,000,000) hrawng a dih. Inn 135 ahcun a zapi ks. sing 6750 hrawng a dih. Hi ks. sing 6750 dih in sakmi inn hrawhpiak si lo in lamdang tu in rian an tuan deuh awk a si. Thil hrawh pakhat lawng hi lam a si tung lo. Democracy cozah nih hi bantuk tuahsernak chia he an cawlcanghnak cu ngaih a chia ko” tiah min langhter a duh lomi upa pakhat nih a biapeh ah a chim.

Hi kong he pehtlai in Minister U Soe Htet nih, “Hakha innhmun samh timhmi ekah 676 chung i phungninglo inn a sami kong he pehtlai in Chin ramkulh cozah bu, tuanvo ngeitu zungkip, sangkip khuabawi le khuanu khuapa tibantuk telhchih in voi 20 hrawng ceihmainak kan  ngei. Cuti ceihmainak kan ngeih hnu le thil sining kan dothlat cikcek dih hnu ah phungninglo bak in a sami an si ti kan hngalh hnu ah anmah zong ralrin peknak kan ngeih hna hnu ah upadi he aa tlak in kan tuahmi a si. Upadi ralchanh in rian a tuanmi paoh cu upadi ning in dantat an si lengmang ko lai” tiah a chim.

Hakha innhmun hrawh an timhmi kong ah hmun ngeitu le ram ngeitu hna cheukhat nih lamzawh in duhlonak zong voihnih an langhter bal cang tiah theih a si.

Hika ah Hakha inn an hrawh lio video zoh khawh a si.

 

About The Author

Na ruahning rak langhter ve.. (Leave a comment)

%d bloggers like this: