NLD Hruaimi Cozah Chan Ah Tazacuaimi Thawnglatu Minung 44 An Tling Manh Cang
City Hunter | 2018 Tho 12| Atu lio NLD hruaimi cozah chan ah tazacuai a tongmi thawnglatu minung 44 tiang an phan manh cang tiah ATHAN- zalongte in chimrelnak lei a cawlcangtu phu nih October 10 ah a thanh.
ATHAN- zalongte in chimrelnak lei a cawlcangtu phu thanhchuahmi ning ah atu tiang thawnglatu hna cung ah tazacuaimi ahmuh 28 tiang a phan i cozah nih tazacuaimi ahmuh (case) 17, ralkap nih tazacuaimi ahmuh 3 le a dangdang hna nih tazacuaimi ahmuh 8 an si tiah theih a si.
Thawnglatu pawl taza an cuainak hna cu; pehtlaihnak upadi in a tambik an si, phunglutlo upadi, Myanmar ram cozah thlithup upadi, Ya-zar-tat-gyi upadi pohmah 500 le 505(b), Media upadi, rammi hna pumpak zalonnak le runven zohkhenhnak petu upadi, vanlawng zuannak lei upadi, thil phorh/kuatnak lei upadi, lah-wah-kah upadi hna nin tazacuai an si tiah cathanh an chuahmi ning in theih a si.
Atu cozah chan ah Reuters thawnglatu pahnih cu rampi thlithup upadi pohmah he thong kum 7 thlak ding biakhiahnak an tuahmi cung ah Myanmar media zalonnak he pehtlai in ramchung ramleng media hna le ramkip mibu nih an soisel ngaingai.
Cu pin ah October 8 chuak Weekly Eleven journal ah langhtermi cabia he pehtlai in Chief Editor Ko Kyaw Zaw Lin, Editor-in-Charge Ko Nari Min le Senior reporter Ko Phyo Wai Win cu Rangoon ramthen cozah bu nih rampi thlanglamhnak pohmah 505 (b) in tazacuai an si.
Ref: RFA Burmese
About The Author
