NLD in Thimnak lutding an fiang cang lai: Hakha in Party EC chungtel a si lomi lungrethei in an um

Salai SH Lian — National League for Democracy (NLD) in Hakha peng ah thimnak aa cuh dingmi an fiang cang lai. NLD Hakha in thimnak ah a lut dingmi minung 14 chung in biakhiahnak cu June 12, 2020 ah an tuah cang lai tiah theih a si.

Atu hi Hakha in NLD Party sin ah thimnak lut ding in a halmi minung 14 tluk an si, nihin (June 11, 2020) ah an pumpak sining cu Committee nih zohfelnak (Screening) an tuah lai. Cu chung in, minung 5 an thim hmasa hna lai tiah kan theih.

NLD Hakha EC nih hin an thim hna lai. Atulio ah, EC ah a telmi hna hi minung 24 an si. Cu hna cu atulio MP a tuan liomi in Pu Ngun Hei, Pu Zo Bawi, Pu Sui Thio, Khuanu/pa chung in NLD chungtel 5 le Party nih Hakha peng EC a thimmi hna dihlak minung 24 an si. Nain, atulio MP a si liomi Pu Siang Awr le Pu Hniar Uk cu an i tel tilo tiah theih a si.

A ralaimi 2020 Ramkomh Kawlram thimnak ah, NLD in Chin ramkulh khualipi Hakha peng in Ramkulh palai caah a lut dingmi an fiang cang. Thimfung thlaknak hmunhma (Constituency) No. 1 in Pu Zo Bawi, Pu Moses Thla Cung le Pi Hoi Sung an si. Cun, thimfung thlaknak (Constituency) no. 2 in Pu Sui Thio, Pu Sunny Thang Cung le Pu Lian Ceu an si lai tiah kan theih.

Ramkulh Palai caah thimnak hmun pahnih in, minung 6 an si. Pu Zo Bawi, Pu Moses Thla Cung, Pu Sui Thio le Pu Sunny Thang Cung (Pi Hoi Sung le Pu Lian Ceu hmanthlak kan ngah kho lo)

Hi ramkulh palai caah minung 6 chung ahhin, party EC nih thimfung thlak in mi tam bik nih (thimfung/mee) an pekmi minung pahnih cu rampi thimnak lut ding an si lai i, a dang a changtu minung pahnih cu an i chiah hna lai tiah theih a si.

Hakha NLD EC chung in anmah le anmah thimfung an i thlak ahcun, atulio a tuan liomi nih thimnak luhnak ticket an ngah khawhnak lam ah a fawi deuhmi a si tiah thimnak ah luh a duhmi pakhat nih a chim.

No. 1 in Pu No Al, Pu Ngun Hei le Dr. Aye Aye Ngun. No. 2 in Pi Iang Tial, Pu Thla Hre le Pu Ngun Vung (No Al hmanthlak kan ngah kho lo)

Cun, Ramkomh Hluttaw ah palai thlah dingmi hi Amyotha le Pyithu Hluttaw tiah a um. Hi hmun hna caah, aiawh palai 3 thlah ding a si. Amyotha Hluttaw in thimfung thlaknak No. 1 in Pu No Al, Pu Ngun Hei le Dr. Aye Aye Ngun an si. Cun, thimfung thlaknak no. 2 caah Pu Ngun Vung, Pu Thla Hre le Pi Iang Tial an si lai tiah kan theih.

Pyithu Hluttaw in Hakha peng aiawh in cuh ding in NLD ah a halmi hi Pu Siang Hu le Pu Tial Ling an si.

Hakha Peng aiawh Pyithu Hluttaw in Pu Tial Ling (Pu Siang Hu hmanthlak kan ngah kho lo)

Nihin, June 11 ah NLD Party Hakha Committee nih thimnak lutding in a halnak ca (form) le an sining zohfelnak an tuah. Cun, thaizing June 12 ah NLD Hakha EC nih thimfung an thlak hna lai. Hi minung 14 chung in, a hmasa ah teinak a hmumi minung 5 cu thimnak luhnak nawl (ticket) an pek hna lai. A pahnihnak a simi hi, ralrin ah Reserve in an i chiah hna lai tiah kan theih.

Thantlang peng in a thimnak ah lut dingmi hna cu Ramkulh (Pyine) No. 1 caah Pu Chan Ham, Jacob Thang, Pu Thla Cung le Pu Steven Van Bik an si. Cun, No. 2 caah Pi Ni Sui Lian le Pu Sui Kar Lian an si.

Thantlang peng in No. 1 Ramkulh palai caah party chung lila ah minung an hun tam caah thim ding ah an har lai. A cuh dingmi caah zong ah, ruahchannak ngeih a hun har ngai ding phun in a um tiah a cuh dingmi sin in kan theih.

Ramkomh in Amyotha Hluttaw caah Henry Van Thio le Pi Sui Ca an si. Cun, Pyithu Hluttaw caah Pu Van Za Li le Pu C Za Cung hna an si. NLD in Thantlang peng ai-awh in aa cuhding thimnak zong June 12 – 13, 2020 ah an tuah lai tiah kan theih.

Atu lio MP si lio mi Pu Bawi Khing le Sihni hlun Pu Siang Zel zong an i tel lai tiah theih a sinain, kan kum khua a upa deuh cang tiah anmah lungtho tein an i let than tiah kan theih.

NLD in aa cuh dingmi paohpaoh cu Party nih June thla chung ah tuah in Central Committeee (CEC) ah June thla dih hlan hrim ah mi cazin kuatding in thawng a thanh hna. Cucaah atu bantuk in aa cuhding palai thimnak an tuah hi a si.

Chin ramkulh ah aa ding Chin party simi Chin National League for Democracy (CNLD) le USDP cu Party in aa cuhding minung thimnak an tuah kho rih lo. CNLD bel cu June 27 tiang MP cuh a duhmi cazin pek khawh a si i, mah le peng cio in EC nih an thim hna lai. Party nih phungning in July 25 ah aa cuhding a fehter te lai tiah kan theih.

Chin ramkulh Hakha in Cianhkhaizi (USDP) in an i cuh lai le cuh lai lo nihih tiang ah thawngpang a fiang kho rih lo tiah theih a si

2015 Rampi thimnak ah MPs Thantlang le Hakha in tlingmi hna cu Hakha in Ramkulh (Pyine) Hluttaw ah Pu Zo Bawi le Pu Sui Thio, Amyotha in Pu Ngun Hei le Salai Siangawr Vanhnin le Pyithu in Pu Joseph Hniar Uk an si i, Thantlang in Pyine Hluttaw ah Dr. Hmuh Thang le Pu Van Thawng, Amyotha ah Pu Henry Van Thio le Pyithu Hluttaw in Pi Ni Sui Lian hna an si. Thantlang in Amyotha Hluttaw Pu Henry Van Thio cu Vice-president rian khinh a si caah, amah aiawhnak hmun caah caankar thimnak tuah a si i Pu Bawi Khing nih teinak a rak hmuh. #

Catialtu pumpak nih amah a hlat khawh tawk in a tialmi a si caah aa palhmi, remh haumi um aikun catialtu pumpak nih tuanvo a ngeihmi a si~ Editor