NLD nih Chin Party a ton lai: Khawika ah an i ton lai?

Salai Lian| 2020 January 20 – National League for Democracy (NLD) cunglei (Bahu) nih 2020 Nov. 8 teinak a hmuh in, Nov. 12 ni ah zapi komhmi cozah (unity govt.) kan ser lai tiah an thanh hnu ah Tlangcung miphun party phu 48 sin ah biaruahnak thawk ding in a rak sawm hna.

Cutin, NLD nih tonbiaruahnak ngei ding in sawmnak a pek mi ah Chin party chung in teinak pakhat te a hmu mi Chin National League for Democracy zong a tel. Nain, khawika ah dah an ton hna lai? Khua zei hmun ah dah an i ton te hnga timi cu ruah ding pakhat a hung um.

NLD cunglei nih an timhlamh bantukin Tlangcung miphun party hna he biaruahnak cu a kal cuahmah. Atu tiang ah, Tlangcung miphun ramkhel phu 10 tluk he tonnak le biaruahnak an ngei cang. Cucu, NLD cunglei nih anmah umnak ramkulh ah an va kal hnawh hna.

A hnu bik tonnak an ngeih mi ah, zatuak 70 tluk kan tlamtling tiah NLD lei nih an i ruah. Nain, Tlangcung party phu 2 he cun, an i tong kho lo. An i ton khawh lo nak a ruang cu hmunhma an thim mi kongkau ah a si.


A hmasa bik cu January 2 ah, Kachin ramkulh an Khualipi Myitkyina ah Kachin party an ton hna. Cun, January 4 ah Mon ramkulh an Khualipi Mawlamyine ah tonnak ngei ding in an kal than nain a hmunhma ruang ah an buai i, tonnak ngei lo in an um.

Hi kong ah, NLD lei in tonbiaruahnak ah hruaitu Dr. Aung Moe Nyo nih cun Party poahpoah kan ton mi hna a si lo. Teinak a hmu mi lawng kan ton mi hna a si tiah a chim.

NLD cunglei nih an fial hna bang, Mon ramkulh NLD zung ah tonnak ngei ding in an sawm hna mi cung ah Mon miphun ramkhel phu nih an duh lo i, hmun dang an sawhnak in an lung a ton thiam lo ruang ah tonnak an ngeih kho lo.

Asinain, Yangon ah hram bunh in a cawlcang cuahmah mi kan nih Chin miphun party (CNLD) hi tah khawika ah dah an ton hna hnga timi ruah awk a hun um ve. Chin ramkulh NLD zung ah maw an i ton lai? Asiloah, Chin ramkulh CNLD zung ah maw? Asiloah, CNLD zungpi (headquarter) Yangon ah dah an i ton te lai?

Tu bantuk in, NLD nih Tlangcung miphun party a ton than hi kum pi kum 5 chung pehtlaihnak ngei lo tuk in an um hnu ah a si. A hlan, Ralkap cozah chan lio ahcun, NLD le Tlangcung miphun hi hmun khat tein a cawlcang timi le ramkhel a tuah timi an rak si.

NLD cunglei nih Tlangcung miphun sin ah sawmnak a tuah ning ah kum 70 chung ram chung buainak a dih dongh khawhnak ding le a felfai mi federal zauk phung ser nak ding ahcun, kan i fonhkomh in cozah kan ser a hau timi ruahnak he biaruahnak an thawknak a si. #

Na ruahning rak langhter ve.. (Leave a comment)

%d bloggers like this: