NLD Nih Zeihmanh Thlennak An Tuahmi Kan Hmu Tuk Lo; Pu Cung Bik

Salai CungCung|2019 April 10| Hakha ah avoi 1nak Chin ramkulh USDP Party le Hakha hrambunh Chin Media cu Aparil 10 USDP Party zung i tonnak an ngeih  lio ah USDP party upa pakhat nih NLD nih zeihmanh thlennak an tuahmi kan hu tuk lo tiah a chim.

Hi tonnak ah hin USDP Party nih kumthum chung NLD cozah an riantuan ning le anmah USDP party an dirhmun chimphuannak an ngei tiah kan theih.

“Tu lio cozah thar nih thlen caan cu cang tiin an rak au len nain kan Chinram zoh tikah zeihmanh aa thleng mi kan hmu tuk lo. USDP cozah chan lio hram rak thawk cia mi le rian rak timh tuah cia mi lawng te an tuan ko. Zei hmanh thlennak an tuah mi kan hmu tuk lo. USDP cozah chan lio thil sining tein a um peng rih ko ti ka hmuh. USDP cozah chan lio ram ca rian rak tuancia mi le rak timh mi hmanh tu ni tiang ah tlamtling in an tuan dih lo. Cucaah Democracy ram ti lawng chim i  riantuan ning ah Democracy ning bantuk in tuan lo ahcun  an riantuan ning tampi an chambau rih ko. Chin ramkulh cozah hi an riantuan ning thazaang a der tuk tiin ka hmuh” tiah tiah Chin ramkulh USDP Director Pu Cung Bik nih Media he tonnak ah a chim.

“USDP cozah an rak kai lio ah hin Upadi thlen ding tamtuk a um. Kan ram ah kah dohnak um lo ding, zatlang nunphung thancho ter ding, a dikfel mi Democracy kan tuah lai tiin  thlennak tampi rak timh tuah mi a si. Kan Chinram ah Mei le Motor lam um lo nak Sianginn tete zong si khawh tawk in tuahpiak an si. Cun kumkhat hnih chung ah duh tawk le zalong tein um kal khawh a hung si i Laitlang hrim hi a bik in papek an rak si. USDP cozah chan lio ah hin democracy he a tlak lomi Upadi paoh kan remh lai kan ti. Kan nih USDP party nih cun Center lei nawlngeihnak nganter lo in ramkulh le ramthen cozah nawlngeihnak kha nganter kan timh. Cun USDP party nih cun Chief Minister thim tik ah President cunglei in thim piak mi si lo in kan mah ramkulh chung Hluttaw in thim ding tiah kan dir pi mi a si. Tu lio NLD cozah kal ning zoh tik ah a cung lei Center nawlngeihnak tu a thawnter i tanglei nawlngeihnak an dir ter.  Kan nih cu zeibantuk Party paoh Chin ram  Democarecy caah rian a tuan mi Party paoh he riantuan ti khawh a si” tiah Chin ramkulh USDP Chairman Dr. Hmuh Thang nih tonpumh nak ah a chim.

“USDP party hi Chin miphun le Chinmi caah party a dir mi kan si. USDP party hi Chin ramkulh Hluttaw ah Chin miphun caah rian a tuanmi kan si. Kannih cu hmailei in lam hmuhsaktu kan si.  Chin ramkulh cozah an riantuan ning siseh ramkomh cozah a riantuan ning siseh palhnak um cun kan chimh hna. Hi pawl kan tuanmi cu Chin ramkulh caah a si.  NLD cozah cu  Center lei nih nawl pek ning in rian an tuan, nain kan nih party cu Center ngawl ngeihnak kha kan zor ter. Chin ramkulh caah rian a tuanmi  party paohpaoh a ngan siseh, a hme siseh thazaang kan pek hna.  Chin ramkulh caah a tuan mi party paoh he i bawnh ding le riantuan ding ah kan hna a tla. NLD cozah cu kan tuan lai (thlen caan a cu cang) tiin rammi an rak kamh mi hna kha rian zok zok tuan lo in a caan dih lai lawng ah tuanmi an si i fakpi in ruah an hau. Rammi dawtnak thinlung tak an ngei lo, an mah party dirhmun tu biapi deuh in an chiah ti hi a lang” tiah Paletwa lei in Chin ramkulh USDP chim phuannak nawlngeitu Salai Khoi Yang nih a chim.

Leave a Commnet

%d bloggers like this: