NLD Party; Pyithu Hluttaw Speaker Thar Ah MP Htun Htun Hein Kan Thim Lai

City Hunter| 2018 March 21| A rian a chuahtakmi U Win Myint zaka Pyithu Hluttaw Speaker thar cu March 22 ah tuahdingmi Pyithu hluttaw tonpumhnak ah thimnak an tuah lai. Hluttaw Speaker ah MP U Htun Htun Hein an thim lai tiah Central NLD party chungtel sin in theih a si.

Rampi President U Htin Kyaw a ngandam lo ruang i a rian in aa phuah hnu ah President thar cu U Win Myint a si lai I Pyithu hluttaw Speaker thar cu Pyithu hluttaw upadi ahran committee haotu U Htun Htun Hein thim a si lai tiah Central NLD party chungtel le central NLD thawngthanhnak lei committee chungtel a simi Monywa Aung Shin nih Khit Thit media sin ah fehternak bia a chim.

“U Win Myint President si ding cu nan hngalh bantuk khan fehter khawh a si ko cang. Pyithu hluttaw Speaker cu U Htun Htun Hein a si ko. U Htun Htun Hein cu NLD CEC ah aa tel. U Ti Khun Myat kha Speaker pek a si lai lo” tiah Monywa Aung Shin nihcun a chimchih.

“March 22 ah tuahdingmi Pyithu hluttaw ah thimnak kan tuah lai. A dih in thim tharmi Pyithu hluttaw Speaker le a bawmtu nih khuahum (ta-ba-pa-dih) hmaika ah biakamnak le minthutnak an tuah lai. Rian chanhnak le laaknak tuah dih in Speaker thar nih biahun cah chimnak a ngeih lai” tiah March 21 ah tuahmi Pyithu hluttaw tonpumhnak ah Speaker bawmtu U Ti Khun Myat nih MP hna sin ah a thanh.

Myanmar rampi President U Htin Kyaw nih a rian a chuah ni March 21 ah Pyithu hluttaw Speaker U Win Myint zong nih a rian a chuahtak ve. Hiti a rian a chuahtak cu rampi President caah timhmi a si caah a si ko lai tiah ramkhel tuahtu tampi nih an ruahdamh cio.
Ref: DVB, Khit Thit Media

Na ruahning rak langhter ve.. (Leave a comment)

%d bloggers like this: