Nu Ngakchia Unau Pathum Tlaihremtu Phungki Pa Tlaih Dingin An Kawl
Salai Aung Aung| 2018 May 11| Irrawaddy ramthen khuahlipi Pathein ah phungki inn lutlai U Nanda Thirih cu nungak ngakchia unau pathum kum tlin lomi a tlaihhrem hna tiin nu ngakchia hna i an nu nih palek sinah April thal ah khan a report caah palek nih tlaih ding in an kawl cuahmah lio a si.
Hi phungki pa hi kum 56 a si i phungki a tuannak kum 7 a si cang. A nu nih a report ning ahcun unau nu pathum, upa bik kum 14 le a nau le kum 10 nun ngakchia pahnih a tlaihhrem hna ti a si.
“Section 376 in a hmuh kan tuah cang. Phungki pa hi a zaam caah tu tiang zeihmanh biahalnak kan tuah kho rih lo. Puhhrinhmi hi phungki a si caah Pathein khuapi chung Tanka Nayaka Committee sin zongah report kan tuah cang” tiah Palek pawl Khin Maung Latt nih a chim.
Ngakchia hna an nu nih a chim ning cun, amah le a fanu le pathum nih hin caan hman tein phungpi ka hi inn chung tang rian an bawmh. April 25 ah khan a fanu pakhat nih tih thing an hla nak ah phungki pa nih a kan tlaihrem tiah a chimh ti si.
A thaizing ah cu kong cu a nu nih palek sinah report a va tuah i kiangkap palek sakhan dang dang zongah phungki pa hmanthlak cu kuat in kawl a si.
Nu ngakchia pathum cu sii-inn ah chekhlatnak tuah dingin kalpi an si i tu tiang hi tlaihhrem an si tak tak le si tak tak lo siibawi te nih an hmuhchuah mi an thanh rih lo tiah palek nih an chim.
“Ngakchia hna hi bantuk thil tha lo an ton sual nak hnga lo nu le pa nih anmah lawng in an fale kha hmun khat khat ah an kal ter hna lo ding le inn zongah mi khual ti bantuk he lawng an chiah tak hna lo ding a si. Upa an si pek ngakchia an si pek ah” tiah Palek bawi Khin Maung Latt nih a chim.
“Tlaihhrem a zor nak dingah ngakchia nu le nungak no te te kha nu pa sualnak kong an cawnpiak an herh nak a um lo. Misual nih hi bantuk sualnak ruangah an ton dingmi dantatnak kha an hngalh lo caah tu le tu an tuah lengmang ko. Cu ruangah hi tluk in tlaihhrem a karhnak hi a si. Cucaah mizapi sinah hi sualnak a tuahmi cu cubantuk dantatnak pek nan si lai timi theihkauhnak kha kau le tam deuh in tuah a herh” tiah Pathein ah zatlang thanchonak rian a tuanmi Padonma phu lutlai U Myint Htay nih a chim.
Irrawaddy ramthen ahhin 2016 ah tlaihhremnak voi 101 a um hi 2017 ah cun 156 tiang a karh, hi hi khuate lei deuh ah a cang mi si tiah palek sin in kan theih.
Ref: Irrawaddy
About The Author
