Nuclear Hriamnam Hrawh Dingin Chak Le Thlang Korea Hnatlaknak An Ngei
TCP-Thantlang| 2018 April 29| North Korea lutlai Kim Jong-n le South Korea lutlai Moon Jae-in cu April 27 ah tonnak an ngei i hi tonnak ah a biapi ngaimi Nuclear hriamnam hrawh ding zong ram hnih hnatlaknak an ngei tiah theih a si.
Korea tlang cung i remdaihnak kongkau 1953 kum lio hnatlaknak rak ngeih cangmi zong a thar in tukum chung hrim ah a thar in biahrennak ngeih than dingin hnatlaknak zong an ngei.
Hi an biahrennak chungah ram hnih hna tlaknak in raltuknak hriamnam zohter ding, ral bantuk in i zohti lo ding, ramri ah i remdaihnak zung pakhat chiah ding le America le Tuluk tel in tonbiaruahnak zong ngeih dingin hnatlaknak an ngei.
Cu pin ah ral ruangah innchungakhar he aa then cangmi hna hmunkhat ah an um khawh nakhng tawlrel le chan he aa tlak ning in tlanglawng lam le motor lam in ramri ah kal khawh nak ding, tukum chungah Asian Games (zaanglek nak) tuah ding zong kap hnih hnatlaknak an ngei.
Atu i tonnak kan ngeihmi hi a hlan lio i voihnih tluk rak i ton cangmi bantuk si lo in atak in a langh khawh nakhnga kan i zuam lai. Hi tonnak kan ngeihmi hi rammi le mizapi hna nih a kan kham in thlauh le harnak zong kan tong ko lai sinain harnak ton hmasa lo ahcun nuamnak cu ton khawh a si lo” tiah North Korea lutlai Kim Jong-un nih a chim.
Hi tonnak an ngeih dih kumkhat chungah South Korea lutlai Moon Jae-in cu North Korea ram ah voikhat tlawnthan aa tim tiah theih a si.
“North Korea nih Nuclear hneksaknak tuah ti lo ding hi a biapi tuk. Cu pin ah Korea tlang cu i Nuclear hrawh ding zong nih hin tampi a bawmh chanh lai” tiah South Korea lutlai Moon Jae-in a chim.
Ref: DVB Burmese, 7Day Daily News
About The Author
