Nuhrin Covo Kong Ah Hngalh Awk Thil Pahnih
Chin Digest| Vol.2, No.6| Nuhrin covo hi minung kip caah a si. Micheu nih acozah nih pek chom dingmi thil ah an rel. Nawlngeitu cheukhat hoi nih cun acozah thil bantuk ah an rel hoi ve i, mizapi covo hi duh paoh in mer len an i tim. Thil hmete a lo nain nurin covo kong ah hngalh a herhmi tete fawizaang tein ruah awk tampi lakah thil pahnih zoh tuah usih.
Kan Nuhrin Covo Kan Hngalh A Herh
Voikhat cu pumh dih ah palik bawi pakhat he bia kan i ruah. “Tuni kan pastor pa chim-mi Abraham nih a fapa nam in a sawh hnikmi hi palik mit in zoh ahcun mi thah aa timh caah tlaih ding bak a si” a ti. A cu bantuk ngelcel ruahnak zong cu! Bible chung ahhin nuhrin covo kong he aa pehtlaimi le zalonnak kong tampi a um ko lai. Cubelte, zalonnak hi tuanvo le zalonnak nih a chuahpimi thil pakhatkhat he a rati lengmang. Zalonnak a umlonak hmun ah cun thim awk a um tawn lo. Zalong tein thimnak paoh zong nih thiltha a chuahpi ve hlei lo. Eden dum ah Pathian nih Adam cu duhthimnak a pek bak ko, asinain, Adam nih a zalonnak a hmanzia a palh caah sualnak ah a tla.
Ziah duhthimnak kan ngei ko nain, kan i palh tawn hnga? A ruang tampi lakah, duhthimnak dik tuah khawh nakding i a herhmi hngalhnak tlamtling kan rak ngeih tawn lo caah duhthimnak kan tuahmi kan i palh tawn. Cu a si caah nuhrin covo kong hi mizapi nih tha tein hngalh le theih a herhmi a si.
“Hi kong cu nawlngeitu kan chimh zong ah, kan sung ko lai” ti sawh ding a si lo. Kan covo a si caah kan chimrel le kan nawr ding cu kanmah tuanvo a si. Nawlngeitu nih an tuanvo an tuan ding a si ve.
Lainawn hi sual a si, nuhrin covo buarnak si ti cu ngakchia hmanh nih kan hngalh cio. Biaknak cawnpiaknak zong ah a um. Asinain, Laimi khrihfa tampi nih cawm khawh tung lo dingmi fa tam tuk ngeih hi lainawn phunkhat a si ve ti kan hngal lo. Fanu fapa a hrin lawng hrin i an nuncan khuasak nakding le an thancho nakding kong zeihmanh khuakhan tuaktaanpiak lo a si ahcun cu ngakchia cu a nuncan a har tuk caah chungkhar le ram caah thilrit phunkhat ah aa cang kho. “Pathian nih khua a khan te ko lai” timi hi hmun tampi le caan tampi ah a tha ngaimi a si ko nain, caan tampi ah cun thathut le zei tuaktan lo bia a si tawn. Mah nih duh paoh tuah hnu ah Pathian puh sawh men cu sual phun khat a si ve.
Midang Nuhrin Covo Kong Ah Kan Bawmh A Herh
Caan tampi cu nuhrin covo kong kan hngalh lo a rak si lo, tihnung dirhmun ah kan um caah zalong tein chimrel le phuannak nawl kan rak ngeih lo tu a rak si deuh. Hi bantuk caan ah a chimrel khomi hi kan bawmh hna a herh. Desmon Tutu nih “na pawngkam ah thil diklomi a can na hmuh ko nain, daiziar in na um ahcun thil thalo tuahtu hna na tanh a si” a ti. Kawlram thil si ningcang kan zoh tik zong ah mizapi tuarinnak kong ah a kan bawmchan khotu ding sin ah chimrelpiak khawh hi a biapi hringhran. Mirang nih “advocacy” an ti i, mizapi asiloah mibu aiawh in chimrel piak, na-wrpiak a si.
Tahchunnak pakhat in kan zoh tuah lai. “Kan vailamtung an kan hrawhpiak i, cuka zawnte bakah pura an sak” ti a si. “Zeitik ni ah dah vailamtung cu an hrawh i cuka i an sakmi pura min cu zeidah a si?” ti biahalnak a um tikah an thei ti ai lo. Tahchunnak ah Kawlram president nih “thil sining fiangte in rak ka chim, kan bawmh lai” ti si sehlaw thil sining hi amah zumh ding in kan chimh thiam lo ahcun a kan bawm lo kho men. Kan nuhrin covo a simi zalong tein biaknak le zumhnak nawl tang ah kan zumhnak hmelchunhnak vailamtung an kan hrawhpiak nain, “kan covo” an kan buarpiak ko tiah tehte piah khawh a rak biapi ve. Hi bantuk a can tikah nuhrin covo kong a tuanmi bu hna nih mizapi nih an chimhkhawh lomi, an hlattlai khawh lomi kha hlattlai in acozah le nawlngeitu le bawmchan khotu bu dangdang sin ah chimrelpiak a rak herh.
Hiti chimhrel khawh nakding ah thil siningcang khawmhsuatnak (documentation) tuah hmasat a herh fawn. “Keimah zeihmanh an ka ti lo” ti i daiziar i um hi nuhrin covo a buartu hna bawmh he aa khat. Khrihfa taktak hna nunzia a si fawn lo. Ngaihthiam kan ti tikah lehrulh lo lawng siloin, sual palhnak a tuahtu kha cu bantuk sualnak a tuah ti nakhnga lo siaherhnak he chimhhrin le cawnpiak, hngalhter hi a tel awk a si.
Bible zong nih pei hitin ati kha: “A chim kho lomi kha chimpiak hna, bawmtu a ngei lomi kha humhak hna; Annih cu an bia chimpiak hna law an ca ah a ding mi biaceihtu va si ko; sifak mi le rethei mi kha dirkamh hna.”
Pastor le evangelist, missionary le biaknak phu i riantuantu hna hi Laiholh ah “Pathian riantuantu” tiah fawite in kan ti tawn. Pathian rian cu Amah Pathian nih a tuan awk a si i, Pathin nih a kan fialmi kan minung rian tu kha minung nih kan tuan awk a si. Khamhnak kong belte thil dang a si. A cu hmanh ah khamhnak hi Amah Pathian nih a tuahmi a si i, sual ngaihchih in khamhnak cohlan le i fian ding hi kanmah rian a si. Mi harsa, mi sifak le a herhbaumi hna bawmh hi Pathian nih a kan fialmi rian a si i, Khrihfa aa ti mi lawng nih kan tuan mi a si fawn lo, Khrihfa a si lo mi hmanh nih an tuan khawh deuh suaumau. Jesuh hmanh nih vailam cu a lenglei vawlei Calvary tlang kalnak lam cung ah pei a phorh cu, biakinn chung pulpit cung ah a si tung lo. Lung in an cheh hnikmi minu a khamh lio ah mizapi kha lainawng lo ding in a khamh a si chih cu teh. Cu a si caah nuhrin covo kong zong ah a chimrel kho lomi, chimrel ding ah caan le hmunhma nih a pek lomi hna caah chimrelpiak hi a biapi ngaingai ve.
Biatlang Kawm
Kan covo le kan tuanvo hi kan hngalh bak a hau. Cun, a hngal rih lomi zong cawnpiak le hrawmh ve hrimhrim ding a si. Biaknak phu hna nih Youth Camp hmanh ah cawnpiaknak tuah ding a si. Cun, a nuhrin covo kong ah a chimrel kho lomi hna dirmkamh le chimrelpiak hi Pathian fialmi rian a si caah caantling in kan tuan khawh lo zong ah kan si khawhnak zawnte ah tuah le tuan hrimhrim ding rian a si.
Catialtu: Khaipi (Aaduedue)
About The Author
