Nungak Nih An Duhmi Helhning
Chin Digest| Vol.3, No.3| Chan aa thleng lengmang mi chung ah Laimi kan i helh ningcang zong chan tiluan nih a fenh thluahmah ve. Hlanlio ah cun coka tappi kam ah meifarte i vanh in nungak rak len le lungthli bia rak i ruah a si nain tuchan ah cun kha bantuk khan tuah peng awk a tha ti lo. Caan nih a pek lo pin ah a hmun le a hma zong nih a pe ti lo. Online le phone deuh tu in kan i lengkai cang. Tu chan ah cun nu zong nih duh mi tlangval cu helh ve ding an si ko, ti a si pah cang ko nain tutiang ah hin cun kan bia le kan hla deuh lawng a si ko rua, nungak ngaingai nih tlangval van helh taktak hi cu ngamh a si deuh rih rua lo dah. Cucaah tlangval rian, nungak helh tikah bawmtu ding tu kan rak chuahpi ko hih.
Tlangval pawl rak i redi cia ko ne u…
1. Na duh mi nungak konglam tha tein hlat hmasa
Tuchan cu IT chan a si le mui aa hmu bal bak lo mi, sining zong fiang tein hngalh lo mi zong i chawnhbiak lengmang ahcun i uar khawh a si. Cu tikah na lung chung ah a um pah i helh na timh cang mi nungak cu tha tein a konglam na hlat hmasa lai. Tahchunhnak, chungkhar pa zeizat khuasa dah an si, unau chuakti pa zeizat dah an si, zei a tuah mi dah a si, tbk pawl kha amah hal hau lo in hngalh cia naa zuam lai. Nan i chawnh tikah, an chungkhar kong nan ceih tikah na theih cia mi kha langhter pah. Hitin na tuah mi nih hin zeitluk in dah amah kha na lung chung ah a um kha a langhter i a lung a hmuiter ngai lai.
2. Zumh awktlak sinak
Minung pakhat le pakhat i pehtlaihnak ah zumh ngamnak hi a biapi bik mi a si. Pakhat le pakhat kar ah zumh ngamnak a um lo ahcun fek tein i pehtlaih khawh a si lo. Cucaah, pakhatnak bik ah na helh ding mi nungak nih an zumh ngam ding in na um thiam a herh. A zumh ngam mi, bochan ngam mi na si nakding ah cun nangmah na konglam kha fiang tein a theihngalh a herh. An tlaihchan nakding ah na lungum bia ruah tawn. Tahchunhnak, na chungkhar kong, na hawile kong tibantuk pawl ceihpi tawn. Cun, a hawile kong, a ngaihchiatnak kong, aa lawmh caan tibantuk pawl kong an chimh caan ah tha tein ngaihpiak law a hawile he zong i hawikomh khawh i zuam ve. Cuti na tuahnak nih na cung ah zumh ngamnak a ngei lai i na sin a um ah a hna a ngam lai i aa nuam lai, na sin um a duh lai.
3. Na Dawtnak kong chim
Nan i pehtlaihnak a feh cang hnu, nan umti caan ah aa nuamh hnu, nan i tlaihchan hnu, nan i zumh ngam veve hnu cun… naa tinh mi a si mi na dawtnak kong kha chim cang. A hramthawk ah cun a lau ngai lai i a chawnh zong voi dang bantuk in an chawn lo kho men. Nain, mah caante ah khan na daithlanh bak lo a hau. Na dawtnak kong le na duhnak kong kha nifatin amah na theihter peng lai. Nan mipum in nan i ton khawh lo hmanh ah phone in na chawnh lai, phone a tlaih lo ahcun ca in na kuat lai. An leh lo zong ah na duhdawtnak kong kha chim nolh lengmang ko. An leh tikah na ka leh caah kaa lawm, ti chim philh hlah. Cun, a biapi taktak mi pakhat cu nan i chawnh tikah amah dirhmun he aa tlak ning in bia na chim peng lai. Amah nakin dirhmun sang deuh le nunning sang deuh in a nung kho mi na va si hmanh ah amah he aa tlukruang tein thutdir thiam le biachim khawh naa zuam lai. Na duhdawtnak kong na chimh lengmang mi le na theihter lengmang mi nih khan a lung chung ah hmun tampi na caah a lak lai i rian a tuan lai.
4. Caan hman tein chawnbia
A caan hman tein chawnh khawh naa zuam lai. Tahchunhnak, zanlei i nan i chawnh tikah slm 7:00 ah na chawnh a si cun a thaizing zong slm 7:00 pm ah chawnh khawh naa zuam lai. Nan i chawnh tikah “nihin zeidah na tuah? na tuah mi a tlamtling maw?” tibantuk pawl na hal hmasa lai. A chim mi poh tha tein na ngaihpiak lai. (A tuah mi kong an chimh duh tuk lem lo cun hal chih tuk duh hlah). Na hal mi a dih tikah amah nih an hal lo zong ah nihin i na tuah mi kong tlawmpal in na chimh ve lai. A ngaih huam theng lo ahcun sau tuk in chim duh hlah. Cun, rian na tuan pah in amah kong na ruahnak pawl kong zong chim chih pah (Bia nan i ruah tikah nangmah lawngte nih bia na chim lai lo aw, amah huam mi le theih a duh mi zong na ceihpi chih ve lai cuh!). Cun, zinglei ah a thawh hlan in a sinah na cakuat phakter khawh naa zuam lai – a phone a zoh tikah nangmah cakuat a hmuh hmasa bik nakhnga le thil dang kong a ruah hlan ah nangmah kong a ruah nakhnga.
5. A sining cohlan khawh i zuam
Bia nan i ruah ah siseh, zei nan tuahnak poh ah neknak bia chim sual hrimhrim hlah. Nan i chawnhbiak tikah siseh, nan tlonlenti tikah siseh a tha bik in le nem tein chawnh khawh i zuam (a hro hna maw hro citcet sual lai ci, mah hlan i naa zuamnak vialte pakpalawng ah a cang ko lai cuh). A umlo kar ah a hawile sin ah maw mi dang sin zong ah maw a thatlonak kong le a santlaihlonak kong chim hrimhrim hlah. A cung i na lung a tlinlonak le na uarlonak a um ahcun
mi dang sin si lo in amah sin ah a nemnak tein le lungthiang tein chimh khawh i zuam, aa remh khawh lo mi a zia si cun hmuhpiak lo in cohlan khawh tu i zuam. Cutin na tuah lawng ah caan saupi tiang nan i daw kho lai. A sining na cohlanpiak khawhnak nih a lungthin dihlak pek ngamnak a chuahter lai.
6. Na upatnak langhter
A cung ah na upatnak langhter lengmang. A thil ti khawhnak cung ah lawmhpi. Zeizong vialte ah nangmah bawmhnak a herh peng tiah ruat hlah. A ruahnak le a khua tuaktannak pawl zong upatpiak law tha tein cohlan khawh i zuam. A chim mi poh doh phun in um lo ding a si lai. Duhdawtnak ah cun aa tluk tein cawlcanghnak nawl le khuaruahnak nawl a um a herh tuk, ti philh hrimhrim lo ding. Na philh sual i keimah bia hi a ngaih awk a si ti phun in na um sual ahcun lohtlau!
Na sin in lawmhbia le thangthatnak bia theih a duh peng. A sam pungsan aa thlen tikah maw, thil thar aa hruk tikah maw naa rem tuk ti chim philh hlah. A duh mi thil muici le a duh mi rawl tibantuk zong eipi khawh zuam pah tawn. Na upatnak nih na kaa in na chimphuan khawh lo mi na dawtnak tampi a langhter khawh.
A donghnak ah Nu hi a tam deuh cu sik le caak an duh lo. An lungthin put a nem bantuk in an ngaihchiat le an mitthli tlak zong a fawi. Cucaah tha pek thiam le aw nem tein chawnhbiak hi an herh tuk. Amah he hmun khat ah a ngaihchiatnak, a lunglawmhnak a hrawmpi khotu le a herh caan i bawmhnak a pe khotu minung he naihniam deuh ah an lungthin hi an chiah tawn. Cucaah, na duhdawt mi nungak he lungthin naihniam tein nan um khawh nakhnga caah a cunglei i kan tial mi hna kha tling tein rak zul te law…
Na hlawh tling hram seh!+++
About The Author
