Nunnak Lamthluan Ah Thazaang Petu Tuanbia (4)

0

The Chinland Post| 2018 June 23| A hlan ah, chizawh le vok hi hawikom tha an si i nikhat cu lam an i chawhnak ah chizawh cu khurthuk ah a tla sual ai. Vok nih hri sau mi pakhat cu a va kawl zokzok i, chizawh nih hri cu amah sinah chanh ding in a chimh. Vok nih cun, hri cu a kualkual in chizawh sinah cun a thlak. Cu tikah chizawh cu a hin a hung tuk i, “ Hi bantuk piin cun hri cu na rak thlak, zeitin dah kai khawh seh na ka ti,” tiah a au hnawh.

“ Asi ahcun, zeitin dah ka tuah lai?” tiah vok nih a hun hal than. “ Na kut khat in ta na tlaih lai,” tiah chizawh nih a leh le cangka in vok cu ‘put’ tiah khorchung ah cun a zuang i hri cu a lak zok. “ Hi hnu in ta, zeitin ka tuah lai?” tiah vok nih a hal tikah, chizawh cu thangpi in a tap. Asinain, tlawmpal ah a nuam tuk i vok cu a fek tein a kuh i, “ Ka lawm tuk, ka hawi” tiah a ti. Hi tuanbia nih a kan chim mi cu, cheukhat hawile hna siseh, na pawngkam minung hna cu an thluak a tha lo, an fimthiam lo. Asinain, na pawngkam a zungzal in an umpi i zei bantuk harnak le zatlaknak na ton hmanh ah nangmah leikap in a dirtu ding an si.

(2)
Nikhat cu mitcaw pakhat pa nih meiceu i put in a dir ko kha lam a chawk mi pakhat pa nih a hmuh tikah, “Na mit a hmuh tung lo ah, hitin meiceu he na dir mi zeidah an that hnemh lai?” tiah a hal. “Minung hi ni a tlak le cangka in keimah bantuk in zei hmanh an hmuh lo tiha ka theih bal. Cucaah, an hmuh khawhnak ding caah hitin meiceu ka putnak hi a si,” tiah mitcaw pa nih a leh. Pakhat pa cu a khuaruahhar le mitcaw pa thinlung put a upat tuk i, “Na thinlung that le mi cung dawtnak na ngeihnak a san zia mu,” tiah a thangthat. Cu a biadih cangka in mitcaw pa nih,” A taktak ah cun hitin mei kaa put mi cu keimah caah a si. A ruang cu minung nih a muihnak ah mei an hmuh hnu cun, keimah kha an ka pah kho ti lai lo,” tiah a ti. Cu tikah lawm a chawk mi pa nih; “ Aw….., minung kip hi mi caah thatnak le bawmhnak kan tuah kan ti len ko nain kanmah caah a that khawhnak bik lam cu kan hlaw kho hrim lo hi ta,” tiah a ti.

(3)
Nikhat cu riantuannak in a rak tinmi pakhat pa nih a hawipa cu a lungtlin lonak thil kong a chimh. “ A tuan cu kanmah nih kan tuan dih. Asinain, thangthatnak a cotu cu khi haotu pa peng. Atu cu, a rian a kai i boss tiah auh a hau cang. A dik lo, thil tuah mi cung ah lungtlin khawh a si lo,” tiah a phunzai. A hawipa nih cun, hahaha…tiah a nih pah khin, “ Atu naa khih mi na suimilam kha zoh hmanh a tawi deuh mi a tung hnu lawng in a sau mi kha na zoh a si lo maw? A taktak in rian a tuantu second tung cu a voikhat te hmanh khi na zoh bal ve lo cu,” tiah a ti. Cu tlawmpal ah a hawipa nih a fian mi cu, “ Minung kan nunnak ah second timi a tung pakhat a um caan poh cu lungtlin lonak vialte hna cu a sawhsawh men le santlai lo rian an si. Cucaah…… second in minute ah, minute ah suimilam a tung lei tiang phak khawh ding tu in ka zuam hmasa a herh,” tiah amah tein thazaang peknak a ti.

(4)
Nikhat ah siangngakchia pa pakhat cu a ca chimtu saya nih, “ Na hmai karkhat na hlan ahcun na thi lai. Cu bantuk thiamthiam in na hnu lei karkhat na thon ah cun na mit a caw lai tiah thim ding siseh law zeidah na thim lai,” tiah a hal. Cu tikah siangngakchia pa nih, “ A kam lei asiloah a sir lei in ka pah lai, saya,” tiah a leh than. Hi nih, a fianh mi cu kan nunnak a um chung poh cu a dong mi lam cu a um lo. Zei bantuk harnak le hnesaknak si hna hmanh sehlaw a dang lei kap in a zoh thiam le a hmuh thiam in kan i fian i, kan zulh tu kha a biapi mi a si. Cucaah, zei bantuk kan ton mi thil kip ah a ong mi lam cu a um ko ti zumhnak he hi ca hi ka tial.

Theihternak: Mah hihi cauk pakhat ah ka rel mi a si i, khoika cauk ah ka rel timi ka cing ti lo. Na theih sicun chungkuh2@gmail.com ah nan ka chimhnak lai kan nawl hna. Deirel Cazual ah chuah cangmi a si.

Salai Van Bawi Mang
Taunggyi
2017 April 2

About The Author

Na ruahning rak langhter ve.. (Leave a comment)

%d bloggers like this: