Nyaunglebin pengkomh thlakhat chung ah kahdohnak voi 70 leng a chuak, SAC ralkap 80 leng an thi
The Chinland Post | 2022 October 7 – KNU battalion 3 nih a tlaihnak hmunhma Bago ramṭhen, Nyaunglebin pengkomh September thla chung ah kahdohnak voi 71 a chuak i mipi 3 an thi tiah KNU nih October 6 ah a thanh.
September thla chung ah SAC ralkap nih mipi pawl an umnak sang le veng chung ah hriamngan a kah i khuami 2 an thi, 3 an i hliam bantuk in khuami 1 cu meithal in an kah i a thi tiah an langhter.
Nyaunglebin pengkomh ah nifatin ngawt in kahdohnak a chuak i kahdoh a fahnak hmunhma pawng khuate pawl cu khua ning piin an zaam tiah theih a si.
SAC ralkap le KNU phufonh karlak ah kahdohnak ngan/hme voi 71 a chuak i SAC ralkap Battalion Commander, Deputy Battalion Commander rank hna telh in 83 an thi i 86 an i hliam tiah theih a si.
KNU phufonh lei in 3 an thi, 12 an i hliam tiah KNU nih a thanh.
September thla chung lawng ah Nyaunglebin pengkomh khuate cheukhat cu SAC ralkap nih vanlei in voi 3 a kah tiah KNU nih a ṭial.
About The Author
