One Championship-MMA Ah Teinak A Hmutu Tial Cung Thang An Don I An Puak

Tawk Tling Thang| 2019 March 12| March 8 zan, Yangon ah tuahmi One Championship-MMA ah teinak a hmutu Salai Tial Cung Thang cu a chuahkehnak khua Chin khualipi Hakha ah a tlung March 12 zingka ah khuami nih sunglawi ngai in an don i an puak.

Tial Cung Thang cu March 12 zingka suimilam 10:00 hrawng ah Hakha Mann motor in Hakha a phan. Van Kulh lam, Hakha khualuh hauka khuacuanhnak (viewpoint)  in khuami minung 200 hrawng nih sunglawi ngai in an don. Hakha Khuanu khuapa, CYO, Khuathar mino le chungkhat sahlawh nih an don. Amah caah an phuahmi Lai hlapi le vawrhla an phuahmi saknak zong donnak hmun ah an ngei kho.

Khuanu khuapa nih siseh, CYO nih siseh, Khuathar mino nih siseh, chungkhat sahlawh nih siseh, Lai puan aihnak, lukhuh chinhnak, pangpar awihnak tibantuk an ngeih cio. Henry Van Thio Parthlam cung ah kai in khuacuanhnak a ngei. Lai Innka lawng chung ah Lai nunphung laam in laampinak an ngeih. Cu hnu ah Khuacuanhnak Lai Innka Lawng in khuathar a tlunnak inn tiang an puak lai. Atu hi an puak cuahmah lio, lam canceo lawng an phan rih. Lai phung ning in nu lawng nih puak a si.

Hi kong he pehtlai in Hakha Khuanu khuapa  in tuanvo ngeitu upa pakhat nih, “Atu bantuk in Tial Cung Thang kan donnak a ruang bik cu kan Chin miphun lawng si lo in Myanmar rampi tiang one Championship-MMA ah teinak a kan hmuhpiaktu a si ruang le tuanbia thar a kan tialpiaktu a si ruang ah a si. Amah conglawmh, upat sunhsak ruang ah atu bantuk in kan donnak cu a si” tiah The Chinland Post ah a chim.

A dongtu he chungkhat sahlawh he thaithawh i hrawmtinak zong an ngei lai. Tial Cung Thang hi Hakha ah nithum hrawng a caam lai i cu dih hnu ah Kalay lei in a kir than te lai.

“Vice President Henry Van Thio he Naypyidaw ah kanmah pahnih te lawng ton biaruahnak zong kan  ngei.  Nan theih bantuk in Vice President Henry Van Thio nih upat conglawmhnak a ka pek. Zei bantuk Roca le laksawng dah a ka pek i zei bia dah a ka ruah timi cu chim awk a tha lo. Kanmah pahnih theih ding lawng in kan i ruahmi a si” tiah Salai Tial Cung Thang nih The Chinland Post ah a chim.

Hika ah Hakha khuami nih Tial Cung Thang an don lio video zoh khawh a si. 

 

Tial Cung Thang le Camboadia pa Rin Saroth cu March 8, Yangon, Thuwana Indoor Stadium ah zan suimilam 8:30 ah a round 3nak tiang an i thua i mark relnak in Tial Thang nih a tei. Tial Cung Thang hi Chinmi chung in MMA ah a hmasa bik aa thuami le tuanbia thar a tialtu a si.

Tial Thang @Tial Cung Thang nih a round 1nak in a round 3nak tiang voi 5 tluk a tengh i voi tam nawn a thongh khawh. Cun, a khuk zong in a suk pah khawh. Asinain remte in a thongh khawhmi a tlawm. Cambodia nihcun voikhat hmanh a tengh lo pin ah remte in voikhat hmanh a thong kho lo. Mark in an rel i Tial Thang nih a tei.

“Myanmar ka dawt tuk, ka duh tuk. Hi nak tha in hmailei zong ah kaa zuam chin lai” tiah Tial Cung Thang nih a chim.

“MMA i ka luhnak a ruang bik cu World Champion si duh ruah asi ko” tiah Tial Cung Thang nih The Chinland Post ah a chim.

Tial Cung Thang hi Bantamweight ah aa thua lai i caan khatkhat cun World Champion laksawng a co khotu a si te lai ti a zumhnak kong Aung La Nsang nih a chim. Cu lawng si lo in amah Aung La Nsang pumpak hrimhrim zong nih thuat a cawnpi.

Tial Cung Thang hi USA wrestling i thuatnak New York State championship voihnih a co bal cang. Cu pin ah BJJ Brazilian Jujitsu ah blue taisawm zong a rak co bal cang. Cun, Lai paih zong ah vui 5 bual a co bal cang.

Tial Cung Thang a chuahkehnak cu Hakha Khuathar a si. A nu le a pa hi Pu Tawk Cem le Pi mang Si an si. Unau chuakti khat pali an si i far pathum a ngei, amah lawng hi pa a si. 2005 kum ah Malaysia a phan. Cun, 2007 ah Syracuse, New York, USA ah an chunglingte in an phan. Hika ah high school zong a dih tiah kan theih.

Leave a Commnet

%d bloggers like this: