Online In Lih Hrawkhrawl Tangka A Kawl Mi Hna Ralring A Herh
Salai Mangpau | September 26, 2023 —
Online in lih hrawkhrawl le lamphun kip hmang in tangka a hal mi an tam tuk caah mipi nih ralring a herh ngai. Hlen an timh mi hna minung leikap chanbaunak kha hmang in an duh zat tangka hal le an miaknak caah online hmang in lentecelhnak phunkip in tangka miaknak an tuah.
Online Tangka Hlennak Myanmar Ramri Ah A Karh
Social Media ah Online game (tangka thap in lenteceihnak a phunphun) page an tuah. Myanmar UWSA “Wa” ram ah September 6-7 ni tiang ah online tangka hlennak a tuah mi Tuluk rammi 1207 cu “Wa”UWSA ram palek nih an tlaih hna i, an ram Tuluk lei ah an kuat hna. Computer le English thiam ahcun “Wa” ram ah thlakhat Yon Tuluk tangka 3,000 an hmu lai tiah Online in lemsoinak an tuah tawn hna ruang ah Myanmar rammi telh in Loas, Cambodia, Vietnam rammi pawl “Wa” ram ah rianṭuan ding in an i thawh tawn tiah RFA nih a chim.
Cyber hmannak in tangka hlennak cu 2019 -2021 kum tiang US dollar 42.5 million a phan tiah Europe Police bu Europol nih an chim.
Tuluk ram lawng si lo in Thai ram lei zong aa tel. Loas rammi zong zuar an tong ve. A bik in nu deuh an si. Kokan Autonomous khua Chin Shwe Haw, Laukkaing ah online in tangka lentecelhnak hmun an on i, cheukhat hmun ah cun tualchung khuami Pyituhsit pawl nih an runven hna ti a si.
Online tangka hlenmi hna hi minung pakhat le bu pakhat dirh in vawlei pumpi huap in thil ṭha lo an tuah tuk cang.
Online Tangka Hleng Pawl Yangon Ah Zung An On
Myanmar ram phungning lo in ramri khua pawl ah online tangka hlen hmang pawl nih nihin ah Yangon khua tiang zung an hun on cang.
MMB tower ngeitu U Kyaw Win Myanmar May Flower Bank cu online tangka hlennak zungpi a si caah mah MMB cu America ram nih dantat a zizutnak an rak tuah i, kum 2 hnu ah Myanmar ralkap pawl nih bank an rak khar.
MMB tower ah rianṭuan mi hna cu MMB innpi a dot 5 nak ah Yangon Airways zungkhan a rak um i April 2022 in Win Win International E-Commerce company in register an tuah ṭhan hnu October thla in mah company rianṭuannak cu Facebook, Telegram le Viber in mi an rak kawl. An thlahlawh ah 450,000MMK (US $ 129) an pek hna.
United Nation Organization (UNO) nih Myanmar ram online tangka hlennak rianṭuan mi a tlawn bik mi 120,000 an si lai tiah thawngzamhnak a tuah.
Nihin vawlei cung ah Hand phone le social media a hmang mi tampi nih social media cyber thilsual tampi an tuah. Mipi lei in cyber thil ṭha lo a tuah mi hna ralchung in runven thiam a herh. Online in lihhrawkhrawl mi lemsoinak a tuah tu hna an konglam theih khawh hi a biapi tuk.
Online ah hmunkhawh a si mi hmantlak, video, aw-voice message telh in social media ahman mi hna nih online in tangka kuatnak, chawlehnak le mah pumpak sining document tial mi vialte hal in tangka docawinak /tangka halnak phun a tuah mi ralring a hau.
Cyber in mi a hleng tawn mi hna nih hin a hmasa bik ah zumh awktlak tein mi an chawhbiwk tawn hna hnu ah hlen timh mi hna an sining vialte an theih dih hnu ah tangka an hal tawn hna. Cucaah zumhawk a si lomi sin ah tangka kuat, lunghrinh pah mi sin ah hmantlak le sining vialte kuat lo ding hi a biapi. Cun mi hlennak tiang a um sual ahcun nawlngeitu sin ah ralṭha tein report tuah ngam ding hi mipi kan rian a si.
Cherhchan:
Bangkok Post
The New Lighs of Myanmar
RFA Burmese News
Hmanthlak : BBC
About The Author
