Ooredoo Myanmar ram in chuah aa tim

0

The Chinland Post | 2022 July 21 – Qatar ram ah hram a bunhmi Ooredoo company cu Myanmar ram in chuah ding ah Share pawl zuar ding ceihhmainak a ngei cang tiah Reuters nih a langhter.

Myanmar ram ah minung 15 million nih an hman i a pathumnak a tambik hman a simi Ooredoo nih a share pawl zuar ding in SAC thawng a thanh cang tiah a langhter. Ooredoo cu Qatar ram ah hrambunhmi a si i vawlei pumpi pehtlaihnak rian a ṭuantu company pakhat a si.

Ooredoo company cawk ding ah a min a larbik cu Young Investment Group, Singapore hrambunh Campanana Group le Skynet hna an si. Share zuar ding ceihhmainak hi a donghnak a phan rih lo tiah Reuters nih a chim.

Ooredoo hi 2022 ah a hmangtu 9 million an um i 2020 ah 15 million an rak um. Kumkhat an tangka a hmuhmi hi $ 330 million hrawng a si tiah theih a si.

Myanmar ram pehtlaihnak khel hi a hlan ahcun Asia ah a ṭhancho a rangbik a si nain 2021 February 1 ah ralkap nih hramhram in uknak a lak hnu ah harnak a tam chin.

Ooredoo hlan ah Telenor zong Myanmar ram in chuah ding timhtuahnak a ngei. Adang tangmi pehtlaihnak hi cu SAC le Japan company KDD nih an ngeihmi MPT le SAC le Vietnam an i fonhmi Mytel hna an si.

SAC nih hramhram in uknak a lak hnu ah Phone line le Internet line atu le atu a tlau lawng si loin pehtlaihnak a ngiathlaitu an um caah mipi hna nih ramdang in rak tuahmi Telenor le Ooredoo kha zumh deuh in hman a si.

About The Author

Na ruahning rak langhter ve.. (Leave a comment)

%d bloggers like this: