Paa I Eisual Ruang Ah Minung 8 Hakha Sii-inn An Phan

0

City Hunter| 2018 June 19| Kalay le Falam kar Chuncung lampi cung ah lam riantuantu hna nih paa an i eisual ruang ah June 18 ah minung 8 cu Hakha sii-inn an phan. Minung pakhat cu a dam deuh caah sii-inn ah a it lo, a dang pasarih cu sii-inn ah an it. 2016 kum lawng ah Laitlang ah paa eisual nakin minung 7 an thi tiah The Chinland Post nih kan theih. 

Hi kong he pehtlai in paa aa eisual vemi pakhat nih, “Atu sii-inn a phanmi hi Gangaw peng, Latpaing khuami kan si. June 17 zan ah paa phunkip cawh in kan chumhti i kan ei. Cu cangka cun kan hawipa pakhat cu a chung nih a tlik a colh. June 18 ah paa a raangmi kan ei than. Cu hnu cun kan zapite in kan chung nih a kan tlik dih. Cu lawng si lo in fakpi in kan luak kan luak. Hakha sii-inn ah phakpimi hi minung 8 kan si nain kei cu ka dam deuh caah ka it lo. Ka hawile 7 tu cu sii-inn ah an it, keimah nih ka conghhramh hna” tiah The Chinland Post ah a chim.

“Paa i eisual ruang ah atu sii-inn a rak phanmi pakhat hi hawi nakin fakbik a tuar, a dang hi cu an dam ngai ko cang. Fak bik in a tuarmi mizaw pakhat zong hi thinphan tuk awk cu a si lo, a dam tuan ve ko lai. Atu bantuk paa i eisual timi hi a kumfatin kan ton theu. An nunnak chanh manh lo in mual a liammi zong an um bal. Cucaah, paa lak hmanh ahhin paa chia hrimhrim cu ralringte in ei a herh. Paa tha a simi, paatlung, paa-paar tibantuk hi cu tihnung tuk lo, asinian hi zong hi i ralrin a herh” tiah min langhter a duh lomi Hakha sii-inn riantuantu siibawi pakhat nih The Chinland Post ah a chim.

“2016 chungah pa meh i ei sualnak in sii-inn a phanmi le a thimi cazin hi, Kanpetlet ah 2016 June 6 ah khan minung 4 nih an i ei sual i pakhat a thi. 2016 Mindat ah June 11 ah khan pakua nih an i ei sual i paruk an thi. Hakha peng Surkhua June 15 ah minung pariat nih an i ei sual, Mindat ah June 18 ah minung pali nih an i ei sual le Tedim ah June 23 ah minung pathum nih an i ei sual” tiah ngandamnak lei Minister zung cazin ning in kan theih (hi cazin langhtermi cu 2017-18 kum cazin aa tel lo).

A luancia, Hakha peng ah paa i eisualnak in minung pathum an rak thi bal. 2017 October 14, Paletwa ah uitlak a hring in a eimi ngakchia 4 lakah pahnih cu an rak thih colh. Laitlang lawng ah si lo in Kawlrawn zong ah paa i eisual nakin sii-inn a phanmi le a thimi hi a kumfatin an um tiah kan theih.

About The Author

Na ruahning rak langhter ve.. (Leave a comment)

%d bloggers like this: