Palek Chung Ahhin Upadi Lonh Nawlpek le Rianfial A Um; Doh Yee Hmu Moe Yan Naing
Salai Aung Aung| 2018 May 9| Thawnglatu he tonnak ngeih in an biahalmi a leh hna caah thong thlak a tongmi palek bawi Moe Yan Naing nih Myanmar palek chung ahhin upadi donh in nawlpek le rianfial a um tiah May 9 ah zung i a kong an ceih dih hnu in a chim.
April 20 ah Yeehmuchoh Tin Ko Ko hruainak in Reuters thawnglatu pahnih cu taza a cuai hna i cucu biaceih zung nih an sual ko tiin zumhtlak tehte tiah an fehter i cu ah cun Moe Yan Naing nih tehte in tazacuaitu dirhmun in biaceih zung ah voihnih tiang an chuahter.
Doh Yee Hmu hlun Moe Yan Naing nih, “Keimah thong an ka thlakmi hi palek chung ahhin upadi nakin a sang deuhmi nawlpek le rianfialnak a um timi ka hngalh. Thong an ka thlakmi hi cu hi nakin thil dik tamdeuh a chuahpitu ding palek dang pawl an tlerhkhonh hna a si” tiah a chim.
Doh Yee Hmu Moe Yan Naing cu kumkhat thongtla ding in bia an khiahpiak hnu ahcun a tanglei hmanthlak bantuk in thongtla thuam in hmuh a hung si cang.
Reuters thawnglatu kha a diklo ning hramhram kehleng phelh in sual an puh hna tiah a chim hnu ninga nak ah Palek zulhphung zulhnak kong upadi Pohmah 16 (b)/22 in thong kumkhat thlak dingah bia an chah.
Palek caah thawnglatu he ton le an biahalmi leh hi khammi cu a si ko nain phungning tein ca in chuahmi cu a um lo tiah a chim. Reuters thawnglatu sin in kan tlaih an timi catlap hna hi fawi tein in ngah khawhmi ca an si ko tiah a chim fawn.
Hi kong ah tazacuai in an tlaih vemi palek bawi Khin Mg Linn zong khuazei ah an hren hngalh a si lonak kong, April 20 ah No. 6 an hmun an thial hna i April 22 ah Khin Mg Linn cu a dang ah an thial a ti. Cun thawnglatu pahnih an tlaihmi Ko Kyaw Soe he voikhat hmanh an i hmuh bal lonak kong zong a chim.
Hi ahmuh he aa pehtlaimi pawl cu May 16 ah biaceih zung ah hlathlainak tuah than ding ti an si i Tat-gyat-gyi Khin Mg Linn le Doh- tat-gyat Nai Linn ah pakhat paoh an si lai tiah theih a si.
Reuters thlawnglatu pahnih kong ah thongthlakmi Yehmu Moe Yan Naing nih, “Ralthate in biadik ka phuan ngammi ruang i thong ka tlakmi hi kaa ngaichih hrimhrim lo. Dong lo in biadik cu fekte in ka dirpi peng ko lai” tiah a chim.
Ref: Irrawaddy
About The Author
