Paletwa Ah AA Le Kawl Ralkap An I Kap; Kawl Ralkap 4 An Thi I 6 Renglo An I Hliam
TCP-Thantlang| 2018 May 5| Thla tampi aa kap ti lomi AA hriamtlai phu le Kawl ralkap hna cu Chinram, Paletwa ramchung May 3 ah an i kap than i Kawl ralkap lei in minung 4 an thi 6 nak tlawm lo hma an pu tiah ULA thawngthanhnak lei tuanvo ngeitu Khaing Thu Kha nih a chim.
May 3 zinglei ceuka ah Paletwa peng Kung-pinn khua lei in Kawl ralkap Min-pia khua ah a ummi kha-la-yah (549) hna cu khuachung um AA ralkap umnak ramri chungah an kah hna caah a tu bantuk in an i tuk cu a si.
A tu lio ah cun AA ralkap an umnak pawng in Kawl ralkap hna cu an i thial ko nain Kawl ralkap nih rak kai hnawh hna an fawite” tiah Khaing Thu Kha nih a chim.
A luancia kum 2017 November thla chung ah khan Paletwa ramchung ah AA ralkap le Kawl ralkap cu an rak i kap bal cang. Thla li tluk ral i tuk lo in an dai nain tutan ah Kawl ralkap nih an kah than hna hi a si. Tuatan an i kahnak chungah khuami aho hmanh aa hliammi le a thimi an um lo tiah theih a si.
2017 November 8 hrawng Chin ramkulh Paletwa peng ah Arakan Army (AA ralkap) le Kawl ralkap i kahnak in Chin ngakchia pakhat le Kawl ralkap minung 17 an thi tiah theih a si.
Chin ramkulh, Paletwa ah peng ah khua a sami le zung hrampi chiah in khua a sami Arakan Army (AA) zungpi (zungchoh) cu Myanmar ralkap nih an laak khawh cang tiah The Voice thawngthanhca nih December 19 zingka ah a rak thanh.
Ref:BBC Burmese, The Voice
